Avaleraasartoorniarneq ingerlalluartoq
Kalaallit Nunaanni Aalisarsinnaanermut Akuersissutinik Nakkutilliisoqarfik ukioq manna avaleraasartoorniarneq pillugu apeqquteqarfigineqarnermini ingerlalluartoqarneranik nalunaarpoq. Taamaattorli neriorsuivallaarnissaq mianersorfigineqarpoq.
Avaleraasartuut siulliit juunip 27-ani pisarineqarput. Taamanimiilli kilisaatit avaleraasartuunik pisaqarluarsimapput. Kalaallit Nunaanni Aalisarsinnaanermut Akuersissutinik Nakkutilliisoqarfimmit, KANUAANA-mit, kisitsisini aggustip 13-ianeersuni takutinneqarpoq, avaleraasartuut ataatsimut katillugit 36.668 tonsit pisarineqarsimasut. Taamaattorli Mads Nedergaard, KANUAANA-mi aalisarsinnaanermut akuersissutinik nakkutilliisoq, avaleraasartoortassiissutit tamakkerlugit pisarineqarsinnaassanersut apeqqutigineqarmat, eqqissisimasumik pissuseqarpoq.
Sermitsiaq allappoq.
- Taamaalinerani ukiut siuliinut sanilliullugu avaleraasartuut amerlanerit tulaanneqarsimapput, pissutsilli allanngulertorsinnaallutik. Avaleraasartuut allamut nuussinnaapput, maannakkorpiarli pissutsit isumalluarnarlutik, Mads Nedergaard oqarpoq.
Avaleraasartoortassat tamarmiusut 66.365 tonsiupput. Naalakkersuisut naatsorsuutiginngilaat pisassiissutit tamakkerneqassasut, taamaattumillu aningaasanut inatsimmi naatsorsuutigalugu, aalisariutinit nunatsinneersut 25.000 tonsit aalisariutinillu nunanit allaneersunit 20.000 tonsit pisarineqassasut. Kisitsisini aggustip 13-ianeersuni aalisariutinit nunatsinneersut 20.000 tonsit ataatilaarlugit pisarineqarsimanerat aalisariutinillu nunanit allaneersunit 17.000 tonsit missingisa pisarineqarsimanerat ersersinneqarpoq.
Allaaserineqartoq aviisimi Sermitsiami atuarneqarsinnaavoq. Aviisi uani pisiariuk:
