Bussi Arctic Winter Gamesimut peqataasunik 30-t missaannik Nunatsinnukartunik ilaasulik, arfininngormat kisimiilluni ajutoorpoq. Illoqarfimmi Hay Riverimi naggataarnersiortoqarnerata kingorna Yellowknifep mittarfianut 500 kilometerit missaanni isorartutigisukkut ingerlaarput.

Apuunnissaminnut kilometerit 50-t kiserngorutipajaartullu bussi kussinermut nakkarpoq. Kalaaleq arsaattartunut dommeriusartoq, Daniel Jakobsen, Arctic Winter Gamesimi dommeriusoq, bussinik ajutoornertik pillugu Sermitsiaq.AG-mut oqaluttuarpoq.

- Aallaqqaataaniilli aquttoq qularuteqartorujussuaq malugisinnaavarput, aqqusinermi quasattoqaroq. Inersimasut sisamaavugut siammarterlutalu inissisimalluta. Taama isorartutigisumut bussernissaq aarlerinanngitsuunngilaq, taanna oqaluttuarpoq. 

Bussimik ingerlaarneq akunnerit arfineq-marluk missaanni sivisussuseqartussaavoq, akunnerillu arfinillit qaangiuttut sila taarpoq, piffissamilu tassani amerlasuut sinipput.

- Tassanngaannaq suna tamarmi aalaleriasaarpoq. Piffissami tassani uanga siniusappunga, taamaammat orpimmut apussanerluta imaluunniit bussi assakassanersoq siullertut eqqarsaatigaara. Kussinermut nakkaratta takusaqarsinnaanngilagut. Taamaallaat pujoq qullerlu aappaluttoq kisiat takusinnaavarput. Tamatta tupaqqavugut, tassami ilaasut tamarmik nipaqannginnamik, taanna ajutoorneq pillugu taama oqaluttuarpoq.

Bussip qaarsoq aporpaa, 100 meterillu missaani ingerlaqqereerluni qaarsoq apoqqikkamiuk unippoq.

- Bussi unimmat inerimasut eqqissisimaniaannarput, inuusuttullu aamma eqqissisimapput. Tamanna pimmat qujanartumik tamatta issiagatta, ajutuunnginnitsinni inuusuttut nikorfallutik oqaloqatigiikkaluarput. Bussi kisimi ajoquserpoq, Daniel Jakobsen oqarpoq. 

- Ajoqusertoqarsimanersoq misissorparput, matu ammarsinnaanngitsoq paasivarput. Igalaarlu ammarneqartariaqarpoq. Tamatta igalaakkut anillappugut, sila nillertorujussuuvoq, immaqa 30-nik issippoq. Bussip aappaa kalaallinik ilaasoqartoq pisup kingorna minutsit tallimat qaangiummata tikiuppoq, tassanilu ikioqatigiilluta kuffertit bussip aappaanut inissippagut.

- Misigisaq nuanneranilu timmisartumik qangattaleratta nuanninngitsumik misigissuseqarpunga. Maanna kisianni qaangiuppoq. Sapaatip-akunnerani kingullermi Canadamut tikikkatta inunnit allanit tusarpara taanna aquttoq illoqarfiit ilaannut ingerlatsisimasoq. Saamit taanna aquttoq mittarfiliaassisussaasoq takugamikku bussitik taarserpaat, bussimik taassuminnga ingerlanneqartumik ingerlarusunnginnamik, Daniel Jakobsen oqarpoq.

Ajutoornermi ajoqusertoqanngilaq.