Apriilip affaani siullermi Brugsenimi siulersuisuni atorfinnut marlunnut qinersisoqassaaq.

Brugseni ilaasortanit pigineqarpoq, ukioq mannalu qinersivinni Nuummi, Qaqortumi Maniitsumilu ilaasortaasut kajumissaarneqarput suliffeqarfiup nittartagaani qinigassanngortinnertik nalunaarutigeqqullugu.

- KNB-mi maanna siulersuisuusut aalajangiussisimapput 2024-mi siulersuisunut ilaasortassanik qinersineq atortut digitaliusut kisiisa atorlugit ingerlanneqassasoq, ilaasortassatut qinigassanngortinnissamik nalunaaruteqarnermut qinersinermullu atatillugu, Brugseni tusagassiuutinut nalunaarummi allappoq.

Aqutseqataassasut

Siulersuisuni ilaasortatut pisiniarfiuteqarfiup ineriartortinneqarneranut aqutseqataasoqarsinnaavoq, siulersuisuni siulittaasoq Avijâja Rosing-Olsen oqarpoq:

- Kalaallit Nunaanni peqatigiiffiit ilaasortanit pigineqartut annersaattut illoqarfinni innuttaaqatigiinnut akuuffigisatsinnut iluaqutaavissornissamut immikkut ittumik periarfissaqarpugut.

- Peqatigiiffitta oqartussaaqataanermik aallaaveqartup qulakkiissavaa suliffeqarfiup siulersuisuinut ilaasortaatitaanit qinigaasunit nunatsinniittunit aqunneqarnissaa, qinigaasullu suliffeqarfiup qullersaqarfianiittut peqatigalugit nunatsinni niuertarfeqarfiit ineriartornissaanut pilersaarusiorsinnaapput, Avijâja Rosing-Olsen oqaluttuarpoq.

Siulersuisunut ilaasortat taakku marluk ukiunut marlunnut qinerneqassapput. Brugsenimi qinersiviit ima agguataarneqarput:

1. Narsaq/Nanortalik/Paamiut
2. Qaqortoq/Maniitsoq
3. Sisimiut/Ilulissat
4. Nuuk