Canadamik USA-millu niueqateqarnermi aporfissarpassuit
Canada Kalaallit Nunaallu sanileriikkaluartut nunat akornanni niuernikkut suleqatigiinniarneq ajornakusoorpoq. Tamanna Sulisitsisut Peqatigiiffiata nioqqutissanillu eqqussuisartut paasisimavaat
Namminiilivinnermut, Nunanut Allanut Tunngasunut Nunalerinermullu Naalakkersuisoq Suka K. Frederiksen qanittukkut oqarpoq inuussutissarsiornikkut siunissami Canadamik USA-millu qaninnerusumik suleqateqarnissaq kissaatiginartillugu. Ottawami ataatsimeersuarnermi Suka K. Frederiksenip Royal Arctic Linep Eimshipimik suleqateqalernissaa mittarfiillu tallineqarnissai asseresuutissatut taavai kalaallit Nunarsuup Avannaani peqateqarnissamut ammasut – pingaartumik qanimut sanilerisanik kultureqatigisanillu.
Tamaviaarnartoq
Siullermiinngilluinnarporli Davis strædet akimorlugu suleqatigiinnerunissamik oqalugiaateqartarnerit. Ilami suliniuterpassuarnik aallartitsisoqartarsimagaluarpoq, sivikitsuinnarmik ingerlareerlutik unittuuinnartartunik. Anningaasarsiornikkut akilersinnaannginnerat pissutigalugu, imaluunniit pissutigalugu politikkikkut tapersersuinerit naammanneq ajormata. Taamatut oqarpoq Sulisitsisut Peqatigiiffianni pisortaq Brian Buus Pedersen.
– Sanilitsinnik Canadamik USA-millu niueqateqarnikkut sinaakkutassatigut atugassarisat pitsanngorsarnissaannik politikkikkut soqutiginninneq soorunami tapersersorparput. Suliniutissanilli piviusumik isumaliuteqartoqarpat inassutigissavarput inuussutissarsiortut oqaloqatigineqaqqaassasut. Niuernikkut attaveqarfinnik nutaanik ammaaniarneq sivisusarpoq tamaviaarnartarlunilu, taavalu taamatut aalajangermeq kinguneqartinneqassaaq. Siusinnerusukkut takusimavarput Nuup Iqaluillu akornanni timmisartukkut attaveqarneq qanoq suujunnaariartortoq, pissutigalugu politikkikkut tapersersuisoqanngimmat. Pisuni taamaattuni isumaliutigineqartariaqarpoq naalagaaffik tapiissuteqartassanersoq. Misilittakkatigut ilisimavaarput niunernikkut attaveqarfiit matuneqaraangdata nutaanik ammaqqinnissamut piffissaq sivisoorujussuaq ingerlasinnaasartoq. Tamanna Ottawami Kalaallit Nunaata Sinniisoqarfianik takuvarput, taanna 1998-imi ammarmat, sipaarniuteqarnerli pissutigalugu 2002-mi matuneqarluni. First Airillu aamma Grønlandsflyp (Air Greenland) Iqaluit Nuullu akornanni timmisartuussivimmik suleqatigiinnertik unitsimmassuk Canadami Nuummilu inuussutissarsiortut attaveqaqatigiinnerat kipitinneqarpoq. Taamaasilluni attavik pingaarutilik annaaneqarpoq, Brian Buus Pedersen oqarpoq.
Allaaserisaq tamaat Sermitsiami atuaruk, taanna uani ataani linki tooriarlugu isissutissarsiffigisinnaavat