Innaarsunni qulimiguulinnut mittarfik matuneqarallarpoq.

Mittarfeqarfinnit tusagassiuutinut nalunaarummi tamanna atuarneqarsinnaavoq.

Innaarsunni qulimiguulinnut mittarfiup eqqaani eqqakkat amerlisimasut ajornartorsiutaaneranni Mittarfeqarfiit matusigallarnerannut pissutaapput, tamanna oqaatigineqarpoq. Apriilimi aamma taamatut pisoqarpoq.

- Innaarsunni eqqaavissuaq ajoraluartumik qulimiguulinnut mittarfiup qanitaani inissinneqarsimavoq. Taamaattumik tamanna timmisartornerup isumannaatsuunissaanut ilungersunartumik ajornartorsiutaavoq, eqqakkat soorlu puussiat plastikkit allallu igitat teqqarsinnaasarlutik aammalu qulimiguullip kaavittuini unissinnaallutik, Mittarfeqarfinni ingerlatsinermut pisortaq Niels Grosen, taama nassuiaavoq.

Kommunip suliassaqarfia

Tamanna ajorluinnartumik ajutoortitsisinnaasoq, ilanngullugu oqaatigaa.

Tamatuma kinguneranik eqqakkat maaniinnarmiittut katersorneqareernissaasa aammalu isumannaallisaanermut aarlerinartorsiortitsiunnaarnissaasa tungaanut, timmisartuussinerit unitsinneqartariaqarput.

Qulimiguulinnut mittarfik marlunngornermi ingerlaannaq atuutilersumik matuneqarpoq. Tamatumalu ilaatigut kingunerisaanik Innaarsunnut tullianik pilersaarutaasumik qulimiguulimmik sisamanngorpat timmisartuussinissaq taamaatinneqarpoq. Maannamuugallartoq matusineq sapaatip akunnerani ataatsimi atuutissaaq, Mittarfeqarfiit ilisimatitsipput.

Ilulissani Avannaata Kommunia aamma Upernavimmi Avannaata Kommuniata allaffia pisoq sunniutaasussallu pillugit ilisimatinneqarput. Innaarsunni eqqaavissuaq kommunimit susassaqarfigineqarpoq.

- Soorunami neriuutigaarput pisoq sapinngisamik piaartumik iluarsiivigineqassasoq, taamaalilluta nalinginnaasumik timmisartuusseqqissinnaalissalluta, Niels Grosen oqarpoq.