Nuuk International Film Festival ukiut aappassaannaanni ingerlanneqartussaagaluartoq programmi annertungaatsiartoq tamanut saqqummiunneqaqqammerpoq. Septembarip 19-ianiit 22-anut ulluni sisamani festivalimi pisussarpassuaqarpoq, filminik takutitseqqaarnerit, ilitsersuisut tikeraat, oqallinnerit allarpassuillu.

Pisussat pingaarnerit ilaattut taaneqarsinnaavoq Abenaki Nationimi ilitsersuisoq 86-inik ukiulik Alanis Obomswin, filmiliortarnermini pingaartumik piviusulersaarutinik 50-it sinnilinnik filmiliortarsimasoq. Filmiliai kingulliit marluk NIFF-imi takutinneqassapput, Alanis Obomsawinilu filmit takutinneqarneranni najuuttassaaq, sisamanngornermili septembarip 20-ani Ilimmarfimmi oqalugiassalluni, tusagassiorfinnut nalunaarummi allassimavoq.

Nunat inoqqaavi sammillugit

Programmimi pingaartumik Issittumi nunat inoqqaavi sammineqassapput. FILM.GL, kattuffik festivalimik ingerlatsisartoq, ukiuni kingullerni issittumi nunani sanilerisatsinni filmiliortartunik attaveqartitsisalersimavoq – ilaatigut suliniut Arctic Indigenous Film Fund aqqutigalugu – tamannalu programmimi takuneqarsinnaavoq.

Festivalimi filmi siulliullugu takutinneqartussaq tassaavoq »Ága«, filmi takisuuliaq nalissaqanngitsoq ukioq manna Berlinadenimi nunarsuarmi takuteqqaarneqartoq, tassanilu Ruslandip issittortaani Inuit inuunerat oqaluttuarineqarpoq. Nunavummit Nunavimmillu filmit filmiliortartullu arlallit peqataassapput. Taavalu festivalimi sameqarfinneersut filmiliaannut naatsunut immikkut programmeqarpoq.

Kalaallit Nunaannit filmiliat naatsut nutaarluinnaat sisamat takutinneqassapput, ilaatigut piviusulersaarut »Beating Hearts – Uummatit Tillerneri«, tassani Kalaallit Nunaanni angerlarsimaffeqanngitsunik ajornartorsiut sammineqarluni. Festivalilu naggataarlugu filmi sivisuumik utaqqineqarsimasoq »Anori« takuteqqaarneqassaaq – asanninnilersaarut pissanganartuliaq Pipaluk K. Jørgensenimit, Nukâka Coster-Waldau inuttaralugu. Aamma inuttaapput Angunnguaq Larsen Ujarneq Fleischerilu.

Meeqqanut filmit

Festivaleqataasunut mikinernut tallimanngornermi arfininngornermilu immikkut takutinneqassapput meeqqanut filmiliaq Nunavummeersoq Islandimiullu titartakkanik filmiliaat nutaarluinnaq »Ploey«.Taavalu issittumi filmiliornerup silarsuaani filmit nuannarineqartut filmiliariniarneqartartullu paasisaqarfigineqarsinnaapput, ilitsersuisut filmiliortartullu tallimanngornermi arfininngornermilu panelimi oqallinneranni.

Festivali Katuami, Grønlandsbankenimi Ilimmarfimmilu ingerlanneqassaaq, ingerlanneqassaarlu Namminersorlutik Oqartussanit, Nuna Fondenimit Heca Nuuk A/S-imillu tapiiffigineqarluni.