Lars Lundblad, Kalaallit Arsaattartut Kattuffianni, taamani GBU-mi, siulittaasuusimasoq, napparsimareerluni ataasinngornerup unnuaani toqukkut qimaguppoq.

Lars Lundblad ingammik arsaattartut akornanni ilisimaneqarluarpoq.

1970-ikkunni 1980-ikkunnilu arsaattartuuvoq, arlaleriarlunilu pissartanngoqataasarsimalluni.

Lars Lundblad arsaattartuuinnarnani ukiuni kingullerni najukkami arsaattartut peqatigiiffianni sungiusaasuusimavoq, ukiunilu arlalinni GBU-mi siulittaasuusimalluni.

Politikkikkut suliniuteqartartoq

Lars Lundblad GBU-mi siulittaasutut 2014-imi tunuarniarluni aalajangerpoq, tamatumalu kingorna John Thorsen siulittaasunngorpoq. Timersoqatigiiffissuaq arsaattunik katersuisoq ingerlakkumallugu nukippassuit atortariaqartut, napparsimaninilu tunuarnerminut tunngavilersuutigai.

- Angut sungiusaasorisimasaq, Kattuffimmi siulittaasorisimasaq, kingornalu siulittaasutut kingoraagaq. Timersornermut uummatilerujussuaq. Meeqqanik inerisaanissamut uummatilerujussuaq. Nunanut allanut unammisartunut sungiusaasuusimasoq. Klubbinut sungiusaaffimminut tunniusimasoq angusarissaatartorlu maanna qimaguppoq. NÛK sinnerlugu tamanut qujaffigiumavara, John Thorsen oqarpoq.

Lars Lundblad aamma politikkikkut suliniuteqartuuvoq, Qaqortumilu Siumumi siulittaasuusimalluni.

Siumumi siulittaasutut politikkikkut sulinermini ilaatigut Qaqortup mittarfittaarnissaa sulissutigisimavaa.

KAK Facebookimini aamma eqqaaniummik saqqummiussivoq: