Ilulissat: Takornarialerisut eqqornerlungaatsiartut
Ilulissani takornarialerisut aasarmanna pujortarnera sikoqarpallaarneralu pissutigalugu kaaviaartitassaraluaminnik annaasaqarsimapput
Arfernik takusassarsiortitsineq Eqimullu angallassinissaraluit pilersaarutit malillugit ingerlanneqarsimanngillat. Pujortarnera sikoqarpallaarneralu pissutigalugit takornarialerisut angallassinissaraluaminnik taamaatitsiinnartarsimapput.
- Aasap aallartinnerani sikoqartorujuunera aamma pujornera pissutigalugu arlalippassuarnik taamaatitsiinnarnikuuvugut, Ilulissanut eqqaanullu takornarianut misigisassarsiortitsisarfimmi, World of Greenlandimi, takornariat misigisassarsiortittarneranni pisortaq, Jakob Schytz, KNR-imut taama oqarpoq.
Ukiup sikua suli katassimanngitsoq
Ukiullu sikuata suli katassimannginnera, aasarmanna takornarialerinermi unammilligassat ilagisimavaat.
KNR naapertorlugu silarluttarnera pissutigalugu arlaleriarluni taamaatitsinermi World of Greenlandip aningaasat 500.000 koruunit missaani isertitassaraluani annaavai. Takornarialeraluni suliffeqarfik alla, Ilulissat Tourist Nature, 300.000 koruunit tungaannut annaasaqarsimanissaq naatsorsuutigaat.