Imigassaq pillugu inatsit nutaaq  marsip aallaqqaataanni atuutilerpat suliffeqarfiit tamarmik ataatsimit amerlanernit sulisullit imigassaq pillugu politikkeqaqqusaalissapput.

Peqqinnissamut Naalakkersuisoqarfik tusagassiutinut nalunaaruteqarpoq.

Imigassamik tuniniaasinnaanermut imaluunniit sassaalliisinnaanermut akuersissutinik nutaanik qinnuteqaateqartoqartillugu tamatigut imigassaq pillugu politikki aamma ilanngullugu nassiunneqartarnissaanik piumasaqaateqalissaaq.

Agathe Fontain: Pitsaaliuinermut iluaqutaassaaq
- Imigassaq pillugu akuersissummik nutaamik qinnuteqaasiornermi imigassaq pillugu politikkeqarnissamik piumasaqaat pitsaaliuinermut iluaqutaassaaq, peqqinnissamut naalakkersuisoq Agathe Fontai (IA) tusagassiutinut nalunaarummi oqarpoq, nangillunilu:

- Suliffeqarfinni tamani ataatsimit amerlanerusunik sulisulinni imigassaq pillugu politikkeqarnissamik atulersitsineq imigassamut tunngatillugu pitsaaliuilluni iliuuseqarnermi pingaaruteqarpoq. Imigassaq pillugu politikkiliornikkut qulakkeerneqassaaq suliffeqarfiup imigassaq pillugu isummernissaa aamma imigassamut tunngatillugu unamminiarnartunngorsinnaasunik qanoq aaqqiinissamut pilersaaruteqartuarnissaa. Assersuutigalugu sulisoq imigassamik ajornartorsiuteqarpat tamanna atuuppoq. Suliffeqarfiit amerlasuut imigassaq pillugu politikkeqarput taamaalillutillu imigassaq pillugu inatsimmi piumasaqaatinik eqquutsitsereerlutik, oqarpoq.

Suliffeqarfiit imigassaq pillugu politikkiliortussat suliffeqarfinnut aanngajaarniutit pillugit politikkiliornissanut najoqqutassiaq, Allorfimmit – Pinngitsuuisinnaannginnermik Ilisimasaqarfimmit – saqqummersinneqartoq, isumassarsiorfigisinnaagaat Naalakkersuisoqarfimmit ilisimatitsissutigineqarpoq.