Inatsisartut inatsisinut ataatsimiititaliaat, tassaasut siulittaasoq Anders Olsen (S), siulittaasup tullia Emanuel Nuko (N) aammalu ilaasortat Kuno Fencker (S), Asii Chemnitz Narup (IA) kiisalu Harald Bianco (IA) ammasumik siunersuinissaminnut pilersaarutertik marlunngornermi ualikkut 14:00 - 15:00 ingerlanneqartussaagaluartoq ingerlatissallugu iluatsinngitsoorpaat.

Siulittaasoq Anders Olsen Sermitsiaq.AG-mut nassuiaavoq ataatsimiititaliami ilaasortat peqataanissaminnut periarfissaat piffissaliunneqaraluartumut ataqatigiissitsisinnaasimannginnerisa taamaatitsinermut pissutaasoq.

Ataatsimiititaliami ilaasortat Anders Olsen aamma Asii Chemnitz Narup piffissaliunneqartumi pisinnaasutuanngorsimapput, Kuno Fencker ataatsimiititaliami allami suliassaminik pissuteqartumik pilersaarutiminik allannguisariaqarsimavoq, taannalu massakkut Danmarkimut ingerlaarpoq, Harald Bianco Nuummukartussaagaluarluni silamik pissuteqartumik kinguaattooqattaarpoq.

Siulittaasup tullia Emanuel Nuko pisinnaajunnaarluni nalunaarsimavoq.

- Piaarnerpaamik nutaamik ulluliinissarput maanna sulissutigaarput, qulakkeerniagassaraarpullu ataatsimiititaliami ilaasortat tamarmiullutik peqataasinnaanissaat, Anders Olsen nassuiaavoq.

Sammisat siunersuinermi nassuaassutigeqquneqartut:

• Inatsimmut tunngaviusussamut missingiut pillugu (UKA2023/49 aamma UKA2023/74) aalajangiiffigisassatut siunnersuutit siullermeerneqarnerannut Naalaakkersuisut akissuteqaamminni naliliipput ’maannali Kalaallit Nunaata namminersortup Inatsit Tunngaviusussaatut missiliummik patajaatsumik, sulili naammassineqanngitsumik peqalerpugut’. Immikkoortut sorliit Naalakkersuisunit naammassineqanngitsutut immikkut isumaqarfigineqarnersut Naalakkersuisumit itisilerlugit nassuiarneqassasut ataatsimiititaliamit kissaatigineqarpoq.
• Naalakkersuisut taamatuttaaq allapput ’Inatsit Tunngaviusussaq pillugu Isumalioqatigiissitap isumaliutissiissutaata paasiuminartunngorlugu allanneqarnera Naalakkersuisut aallartereerpaat’. Suliap tamatuma erseqqinnerusumik nassuiaatigineqarnissaa suliallu killiffiata paasissutissiissutigineqarnissaa ataatsimiititaliamit kissaatigineqarput.
• Naalakkersuisut aamma allapput, ’innuttaasut akuutinneqarnissaat aalajangeeqataanissaallu pingaaruteqarpoq’. Taamatut peqataatitsinissamik suliniut qanoq ingerlanneqassanersoq pillugu Naalakkersuisut pilersaarutaat itisilerlugit nassuiaatigineqassasut ataatsimiititaliamit kissaatigineqarpoq.
• Ataatsimiititaliap paasivaa ’Inatsit Tunngaviusussaq pillugu Isumalioqatigiissitap innuttaasunik naapitsillutik, nunarput tamaat angallavigalugu siunneersuummik saqqummiussinissaat’ Naalakkersuisunit kissaatigineqartorujussuusoq. Soorlu ataatsimiititaliaq isumaliutissiissummini allattoq Inatsit tunngaviusussaq pillugu isumalioqatigiissitami ilaasortat innuttaasunik oqallitsitsinermik ingerlatsissappata tamanna ataatsimiititaliamit eqqarsarnartoqartinneqarpoq isumalioqatigiissitat atorunnaarsinneqareermata. Taamaattumik oqallitsitsilluni ataatsimiisitsinernut Naalakkersuisut pilersaarutaat kikkullu taakkuninnga ingerlatsisuussanersut ataatsimiititaliap paaserusuppaa.
• Innuttaasunik peqataatitsinissamik suliaqarnissamut innuttaasullu peqatigalugit oqallinnissamut piffissaliussamik paasitinneqarnissani ataatsimiititaliap kissaatigaa.
• Siunissami suliassat eqqarsaatigalugit aningaasaqarnikkut sinaakkutissat qanoq ittut Naalakkersuisunit missingersuusiorneqarpat?