Nannut pillugit ingerlatsinermut pilersaarummi aallaqqaasiutitut erseqqissaatigineqarpoq Naalakkersuisut siunertarigaat, “isumalluutinik uumassusilinnik piujuartitsinermik tunngaveqartumik nakkutiginninnissamut erseqqissumik oqaasertaliisoqarnissaanut. Aamma erseqqissaatigineqarpoq, nanoq tassaasoq Avannaarsuani Tunumilu piniakkani pingaarnersaasunut ilaasoq.

Kulturikkut kingornussassaq

 – Nannup amia piniartunut atisatut oqorsaataavoq pisariaqartoq aamma atisatut qangaaniillu kulturikkullu kingornussatsinnut ilaasoq. Neqaa mamarineqartuuvoq aamma uumasunut imarmiunut nunamiunullu aalisakkanullu allatuutaalluarluni. Taamaattumik nannut amerlassusaat tamatta paarilluassavagut, maannakkut silap pissusaata allanngorneranit allanillu peqqutinik nannut sunnertianeranni, Piniarnermut Naalakkersuisoq Erik Jensen aallaqqaasiummi allappoq.

Politikkikkut aalajangersaasarneq pissutigalugu ukiumut qanoq amerlatigisut nannut pisarineqarsinnaanersut pilersaarummi eqqaaneqanngilaq.

- Naalakkersuisut kissaatigalugu anguniarpaat nannut pillugit aqutsinissamut pilersaarummik atuisut tamarmik, kommunit aamma aalisarnermik piniarnermillu najukkani kattuffiit atuutsitsilernissamut peqataassasut, taamaalilluta tamatta nannut piujuartinnissaannut akisussaaqataallutalu peqataassuseqarniassagatta, Erik Jensen allappoq nangillunilu:

- Taamaaliornikkut aamma nannut uatsinnut kinguaariinnullu tullinnguuttussanut nerisassat piniartullu atisassaasa suli ilaanissaannut periarfissap allanngortinnginnissaanut peqataalluta, kiisalu tammajuitsunik tuniniaanermi saniatigut isertitaqarfittut tikilluaqqullugu. Taamaattumik neriuppunga siunnersuut tamassi tigulluassagissi, Erik Jensen pilersaarummi septembarip 11-ata tungaanut tusarniaassutigineqartumi allappoq.

Paasissutissat

Pilersaarummi nannut mingutsitsinermit, nappaatinit​​​​​​, uuliakoornermit, aatsitassarsiornermit, umiarsuit angallannerinit aamma peqqusersiorluni isertorluni piniarnermit aarlerinartorsiortinneqalersinnaanerat arlalinnik paasissutissiisoqarpoq.

Nannut nunat killeqarfii akimorlugit ingerlaartarmata nunat tamaalaat assigiinngitsut suleqatigineqarput.

Suliniutissat tallimat

Nannut pillugit ingerlatsinissamut pilersaarummi suliniutigineqartussanik tallimanik ukunannga imaqarpoq:

• Attaveqaqatigiinneq oqaloqatigiinnerlu
• Piujuartitsinermik tunngaveqartumik piniarneq
• Sumiiffiit piniarfiusut illuanilu Sumiiffiit piniarfiunngitsut
• Akerleriiffiit annikillisillugit
• Nunat tamalaat suleqatigiinnerat

- Nannut inuillu akornanni akerleriinnernut atatillugu, assersuutigalugu nanoq uteqattaartumik najugaqarfimmut qanillisaqattaarpat imaluunniit isertaqattaarpat, nannunik naapitsiffiusinnaasuni angallanneq pillugu najoqqutassat atuuttut pillugit upalungaarsimasoqassaaq, kiisalu akerleriinnerup isumaginissaanut najoqqutassaqarluni, pilersaarummi allassimavoq.

Qimaatissutit eqqakkanillu passussineq

Pilersaarummi oqaatigineqarpoq, qimaatitsissutit toqumik kinguneqartussaanngitsut atorneqarnerisa pitsaanerulersinnissaat, eqqaavissuarnilu nunaannarmiittuni nannut perlilerlutik ornittagaanni eqqakkanik passussinerup pitsaanerulersinnissaa.

Nannunik alapernaarsuinermut sumiiffimmiittut ilinniartinneqarnissaat, illoqarfimmut qanittunik nannunik toqutsineq pisassiissutinut ilanngunneqarnissaat, nannut ajornartorsiutaasut passunneri pillugit periusissiamik/najoqqutassanik inerisaasoqarnissaa, pilersaarummi suliniutissatut siunnersuutinut ilanngunneqarsimanerat allassimavoq.

Nalunaarusiaq tamaat atuaruk: Nannut pillugit aqutsinissamut pilersaarut, August 2018