Nuummi sialleraluartoq innuttaasut amerlasuut inuiattut ullorsiornerup Nuup saavani nalliuttorsiutigineqarneranut aggerput.

Ullorsiorneq kommunip allaffianit Nuutoqqamut ingerlaaqatigiinnermik nal. 7.35 aallartinneqarpoq, tassani erfalasoq amuneqarlunilu erinarsoqatigiit tusarnaartitsipput.

Tamatuma kingorna qamutilittartoqarpoq, pingajussaanik  qamutilittarnermi puiseqqaanniunneq aallartinneqarpoq.

Allaaqqissorsuarmut seqinnarissuarmullu tunngassuteqaannanngitsoq

Takkuttunut tikilluaqqusisoqarnerata kingorna, Kommuneqarfik Sermersuumi borgmesteri Asii Chemnitz Narup oqalugiarpoq.

- Ullumikkut silap qanoq ikkaluarneraluunniit soqutaavallaanngilaq, seqinnarippat, masannarpat nittaalarpalluunniit. Ullumikkummi Nunatsinnut tunngasut tamaasa nalliuttorsiutigaavut – nalliuttorsiutigaarput nuna alianaatsorsuaq assigiinngitsorpassuarnik kiinnersinnaasoq. Nunatsinnut asanninnerput  qilassuarmut allaaqqissorsuarmut seqinnarissuarmullu tunngassuteqaannanngilaq, borgmesteri oqalugiarnermini ilaatigut taama oqarpoq.

Taassuma kulturi ukkataralugu isiginnaartitsisarfeqarneq, assilialianik eqqumiitsuliortoqartoq, qiperuisartoqarnerput, nipilersortartoqarneq, taalliortoqarneq, atuakkiortoqarneq allarpassuillu taakkartorpai.

Naalagiarneq

Oqalugiarnerup kingorna Nuup illoqarfiata nipilersortartui tusarnaartitsipput. Kingornalu Annaassisitta Oqaluffianut ingerlaqatigiittoqarpoq, tassani naalagiaqatigiittoqarluni. 

Leiff Josefsenip Nuutoqqami assilisai allaaserisap qulaani takukkit.