Officerit nunatsinni najugaqartut amerlassusaat 60 %-imiit 90-%-imut qaffanneqassaaq. Allannguutissatulli siunnersuut pineqartoq ukiut tallimat qaangiuppata aatsaat atuutilissasoq, siunnersuummi Aalisarnermut, Piniarnermut Nunalerinermullu Naalakkersuisoqarfiup tusarniaassutigalugu nassiuteqammigaani takuneqarsinnaavoq.

Taamaalilluni siunnersuut saqqummiuteqqaarneqarmat naammagittaalliortorpassuit tusaaneqarsimapput. Kalaallit officeritut atorfinni assigiinngitsuni pisariaqartinneqartumik piginnaasallit ikippallaartut tunngavilersuutigineqarsimavoq.

Ukiut tallimat naammannerpat?

Maskinmesterissanik, aquttussanik il. il. ilinniartitsinissamut ukiut tallimat naammannersut apeqqutaavoq.

Allatigut aamma allannguisoqassaaq, pingaartumik kalaallinut inuusuttunut iluaqutaasussanik.

- Malittarisassat maannakkut atuuttut malillugit, inuk qaammatini 14-init sivisunerusumik Kalaallit Nunaata avataani najugaqarsimasoq Kalaallit Nunaanni inuit nalunaarsorsimaffianni qaammatisiutit ukiuini kingullerni marlunni nalunaarsorsimanngikkuni aammalu qaammatisiutit ukiuini kingullerni marlunni Kalaallit Nunaannut tamakkiisumik akileraartarsimanngikkuni kalaallit aalisariutaanni inuttaasinnaanngilaq, Aalisarnermut Naalakkersuisoqarfik ilisimatisivoq, nangillunilu nassuiaatigalugu:

Ingerlaannaq inuttanngorsinnaaneq

- Kalaallit Nunaanni nunanilu allani nuuttarneq eqqarsaatigalugu, inuup Kalaallit Nunaanni nalunaarneraniit ukiunik qulinik kingumut qiviartoqartalerneratigut piaartumik inuttanngornissamut tunngatillugu immikkut akuerineqarnissamut itigartitsinerit atorunnaarsinneqartassapput, taamaalillutillu inunnut pineqartunut inuiaqatigiinnullu iluaqutaasussanngussallutik.

Allannguinermi taamaalilluni tunngavigineqarpoq, kalaallit inuusuttut Danmarkimi nunaniluunniit allani ilinniagaqarniarlutik nuuttarnerat.

Novembarip 22-at tusarniaanermi akissuteqarnissamut piffissaliunneqarsimavoq.