Isigiarsuttunut ikiorsiissuteqaqqilissasoq
Naalakkersuisut Synscenter Refsnæsimik isumaqatigiissuteqaqqinnissartik soqutigaat. Nunatsinni isigiarsuttunut tappiitsunullu siunnersuisartunik maannakkorpiaq soqanngilaq, tassani meeqqat inuusuttullu 23-it siunnersorneqarsinnaanatik.
Tappiitsunut isigiarsuttunullu siunnersuisarneq januaarip aallaqqaataani 2022-imi unitsinneqarpoq. Kingorna isigiarsuttunut tappiitsunullu nunatsinni siunnersuisartoqanngilaq.
Isigiarsuttut tappiitsullu siunnersorneqarsinnaannginnerat pillugu ISI-mi siulittaasup tulliata narrutsaatigaa. Suliniutit amigaataanerarlugit, meeqqallu atuarnerminni ikiorsiissutinik tunineqarneq ajornerat isornaretorsiorlugu.
Tamanna tunngavigalugu Atassutip siulittaasua Aqqalu C. Jerimiassen Naalakkersuisunut apeqquteqarpoq. Atuarfinnut kommuninullu siunnersuisaleqqinnissamut pilersaaruteqarnersut.
Akissut aappiuvoq. Naalakkersuisut Synscenter Refsnæsimik isumaqatigiissuteqaqqinnissartik soqutigaat.
- Synscenter Refsnæsimik isumaqatigiissuteqarnissamut atatillugu meeqqat inuusuttullu tappiitsut isigiarsuttullu siunnersorneqarnissamik ilitsersorneqarnissamillu pisariaqartitaat pillugit Naalakkersuisut kommuninik qanimut oqaloqateqarnissartik kissaatigaat.
- Meeqqat inuusuttullu isigiarsuttut suliassaqarfittut pingaarutilerujussuartut isigaara tamannalu pingaarnersiuinermi salliutittorujussuuara, taamaattumik Naalakkersuisut Synscenter Refsnæsimik isumaqatigiissuteqaqqinnissartik kissaatigaat, Aqqaluaq B. Egede akissummini allappoq.
Synscenter Refsnæs Pissassarfiliartassaaq
Naalakkersuisoq akissummini aamma allappoq Naalakkersuisut Synscenter Refsnæsillu akornanni isumaqatigiissutaasussami ilaatigut Pissassarfimmi Synscenter Refsnæsip pikkorissartitsineratigut atuarfinnut siunnersuisarneq ilitsersuisarnerlu aamma ilaassasut.
Apeqqut kukkusumut nassiunneqarsimasoq
Inatsisartunut ilaasortaq, Aqqalu C. Jerimiassen, apeqquteqaatini akissuteqarfigineqarsimanngitsoq Sermitsiaq.AG-mut oqaatiginikuuaa.
Aqqaluaq. B. Egedep apeqqut Naalakkersuisunut nassiunneqarsimasoq ilumoornerarpaa. Apeqquteqaalli siullermik Meeqqanut Inuusuttunullu Naalakkersuisoqarfimmuunngitsoq naalakkersuisoqarfimmulli kukkusumut nassiunneqarsimanera naqqiissuteqarfigaa.