Illersornissap gummibådiutaasa pisiarineqarnerannut, ajoqutaannut nakkutilliinerullu naammannginneranut tunngasut eqqartuussissuserisunit avataaneersunit misissorneqalersut, Illersornissamut ministeriaqarfik qanittukkut ilisimatitsivoq.

2021-mi septembarimi umiarsuup alapernaarsuutip Ejnar Mikkelsenip gummibådiisa ilaat kinnguvoq, ilaasullu marluk umiarsuup ataani puttallaqqinneq ajulerput ilisimajunnaarlutillu, annappulli.

Kukkunerit amigaatillu ajorluinnartut

Gummibådit 7 meterisut takitigisut, manngersunik naqqallit marlunnillu motoorillit, arlalinnik ajorluinnartunik ajoquteqarsimasut kingusinnerusukkut paasineqarpoq.

"Gummibådit atorneqarsinnaanngitsutut isumaqarneq kukkunerussasoq" Issittumi Sakkutooqarfik ilisimatitsivoq.

- Siunertanut assigiinngitsunut atorneqartorujussuusarput, soorlu aalisarnermik nakkutilliinermut, umiarsualivimmut umiarsualivimmiillu umiartornermut allanullu. Gummibådilli atorneqarnissaannut killilersuuteqarpoq, tassa mallersumi anorlerneranilu isumannaallisaanissaq eqqarsaatigalugu atorneqarsinnaanngillat, Issittumi Sakkutooqarfik Sermitsiaq.AG-mut ilisimatitsivoq.

Suliassap naammassineqarnissaanut aalajangiisuunissaanik takussutissaqanngitsut, Issittumi Sakkutooqarfiup erseqqissarpaa.

"Illersornissamut atortussanik pisiortornermullu aqutsisoqarfimmi (FMI) pitsaassutsimik qulakkeerinninnermi gummibådit pisiarineqarlaat pigineqartullu arlallit ajoquteqartut paasineqarsimasoq“ Illersornissamut ministeriaqarfiup eqqartuussissuserisumit misissuisitsinermut tunngavilersuut nassuiarpaa.

Pisiortorneq unitsinneqarpoq

- FMI ukiuni arlalinni naammattumik pisariaqartumik nakkutilliisimanngitsoq pitsaassutsimillu qulakkeerinnissinnaasimanngitsoq misissuinerup takutippaa, ministeriaqarfik ilisimatitsivoq.

Gummibådit taakku pisiarineqarunnaarsimasut, gummibådillu Pro-740-t, Korsørimi tuniniaasarfimmit Pro-Safe-meersut, ingerlaannarsinnaanissaat qulakkeerniarlugu aaqqiissutissanik ujaasisoqartoq aammattaaq ilisimatitsissutigineqarpoq.