Sorsunnersuup kingulliup kingornali allaat nul-likkut tikillugit Kalaallit Nunaata Danmarkillu akornanni najummatsisimanartumik inissisimasarnikuupput, immaqa aamma allatigut, kisiannili pingaaartumik Danmarkip sakkutooqarnikkut nunatsinnik isumasiueqqaarani apereqqaaranilu atuisarsimanera pillugu.

Tamannali nunat taakku marluk akornanni aaqqiagiinnginnernik pilersitsisarsimaqisoq qimanniarlugu suleqatigiissutigisimasartik iluatsilluarsimarpasipppaat maannalu qanimut suleqatigiinnikkut inerisaaneq ingerlanneqalersimalluni.

Tusagassiuuteqarfik Sermitsiaq.AG-mit Vivian Motzfeldt aamma Troels Lund Poulsen apersussallugit periarfissaqartinneqaratta, pingaartumik illersornissaq pillugu isumaqatigiissut aammalu tamatumunnga ilaliussaq Kalaallit Nunaata, Savalimmiut aammalu Danmarkip illersornissaq pillugu isumaqatigiissutaat apeqqarissaarutigivagut.

Vivian aamma Troels tamarmik naammagisimaarinnipput suleqatigiinneq taanna maanna inerisitaqarfiulersimammat tigussaasunik inernernik pilersitsisoqartalerluni, taakkulu isumaqatigiissutaasut illuatungeriit tamarmik peqataaffigisinnaasaannik iluseqartinneqarmata. Taakkumi ersarissumik naqissusiipput ataqqeqatigiilluni naligiimmillu inissisimalluni sulineq ingerlanneqartoq.

Troels: Issittoq sakkulersorfiussanngilaq

Illersornissamut tunngatillugu Kalaallit naalakkersuisuisa ersarissumik piumasarisaat tassaavoq issittup, pingaartumilu nunatta sakkulersorfiunnginnissaa, tamannalu danskit naalakkersuisuisa sapinngisartik tamaat naammassiniarsimavaat:

- Danmarkimi illersornissamut isumaqatigiissut tunngavigalugu Danmarkimi naalagaaffeqatigiinnilu tamani piginnaasanik annertusaanissamut aningaasaliissaagut. Kalaallit Nunaanni eqqaanilu sakkussiornerup annertusarnissaa pilersaarutaanngilaq. Kalaallit Nunaata sakkulersorfiunnginnissaa Danmarkimi naalakkersuisut qulakkeeqataaffigissavaat.

- Illuatungaanili naalagaaffeqatigiit iluanni neriorsoqatigiippugut. Issittumi piginnaasat annertusarnissaannut suliniutit assersuutaapput. Dronet marluk atulerneqarnissaat anguneqarpoq, naak siullermik aningaasaliissutit 750 milliuunit koruunit naammanngitsut paasigaluarigut. Aningaasaliissutit 1 milliardit koruunit januarimi qulakkeerneqarput, dronellu pisiarineqarsinnaalerlutik.

- Dronet saniatigut Kalaallit Nunaata sakkulersorfiunnginnissaanik qulakkeerinninnissamut allanik aamma kissaateqartoqarpoq, soorlu nutaanik nakkutilliissutinik umiarsualiortitsinissaq. Kangerlussuarmut tunngatillugu apeqqut suli aamma inissinneqanngilaq, issittumili tunngaviusumik ilinniarfik maanna iluatsillualereersoq, suliniutini assersuutit ilagiinnarpaat, illersornissamut ministeri Troels Lund Poulsen oqarpoq.

Vivian: Suleqatigiinneq naligiinnerusoq pilermat nuannerpoq

Naalagaaffinngornissamut Nunanullu allanut Naalakkersuisup, Vivian Motzfeldtip Danmarkip illersornissamut tunngatillugu Kalaallit Nunaat pineqaraangat nunatsinnik peqataatitsilernera iluarisimaarpaa:

- Nunatsinnit ineriartorneq maannakkutut ittoq toqqissisimanarteqaarput, immitsinnut naatsorsuutigisinnaavugut tatigeqatigiillutalu. Ukiualuinnannguit qaangiupput maannakkutut ittumik tatigeqatigiinnerup malunnanngilluinnarnera misigigatsigu, maannalu malugaarput.

- Europami nunanilu allani sorsunnersuit eqqissiviilliornerillu eqqarsaatigalugit, eqqaamasariaqarparput naak pisut ungasikkaluarlugit kinguneri qanimut aamma malugisinnaasaratsigit. Taamaammat sakkulersorfiunnginnissamik kissaateqarnerput nalilersortuarlugulu oqimaalutartuartariaqarparput, killeqarfigullu minnerunngitsumillu attaveqaatigut mianernartut paaralugit.

- Taamaammat sakkutooqarnerup isumaa, tassa nunatsinnik inuiaqatigiinnillu paarsisuunerat piareersimaffigisariaqarparput. Illersornissaqarfik maani sorsunnermik ingerlatsissanngillat, kisiannili imartatsinnik, nunamik silaannarmillu nakkutilliillutillu paarsissallutik. Tamatsinnut pingaaruteqarpoq paasissallugu piginnaasat annertusarnissaannut aningaasaliineq sorsunnermik kinguneqassanngitsoq, illersornissamilli annertunerusumik kinguneqassasoq, Vivian Motzfeldt erseqqissaavoq.