Kalaallit Airportsimi siulersuisunut siulittaasoq Johannus Egholm Hansen nalornissutissaqanngilaq. Nuummut, Ilulissanut Qaqortumullu mittarfiliornissanut neqeroortitsinissaq kinguartittariaqanngilaa, Inatsisartuni aappassaaneerneqarnissaa pingajussaaneerneqarnissaalu aamma utaqqisariaqarnagu.

Suliaq 2015-imi ingerlareersimasoq Simon Simonsenip tusagassiortunut katersuutitsinermini saqqummiuppaa. Mittarfiit takissusissaat aamma 2015-mi aalajangiunneqareersimasut erseqqissarlugu. Kalaallit Airports 2018-mut aningaasanut inatsimmi aningaasaliiffigineqarpoq, pisussaatitaallunilu suliap ingerlatiinnarneqarnissaa.

- Neqeroortitsinissaq Kalaallit Airportsimit ingerlatiinnarneqassaaq, Simon Simonsen oqarpoq. Naalakkersuisooqatigiit tamanna isumaqatigiissutigisimagaat erseqqissaatigaa.

Inatsisartut ataasinngormat ataatsimiinneranni Naalakkersuisooqatigiit mittarfiit pillugit isumaqatigiinnerat takujuminaappoq. Mittarfiit 1200 meterisut takitigisut misissorneqarnissaat Partii Naleqqamit misissorneqarusuppoq. 

Mittarfinnut suliaq tuaviuunneqassanngitsoq Simon Simonsenip anguniarpaa, Partii Naleqqallu misissuisitsinissamik piumasaqaataa aamma akissuteqarfigineqarumaartoq oqaatigalugu.

Partii Naleraq mittarfiit pillugit Naalakkersuisooqatigiinnit allaanerusumik isumaqaraluartoq suliap naammassineqarnissaa Siumumit anguniarneqarpoq. Ataatsimiititaliaq isumaqatigiilluni innersuussuteqarsinnaappat, tamannalu ukiaanerani Inatsisartut ataatsimiinnginnerani pisinnaappat, aasaru Inatsisartut immikkut ittumik ataatsimiigiartinneqarsinnaapput. 

Mittarfissat ataatsikkut suliarineqarnissaat Naalakkersuisut isumaqarput. 

Kalaallit Airportsip siulersuisui sisamanngorpat ataatsimiissapput.