Kangerlussuarmi mittarfiup qulimiguulinnut mittarfinngortinneqarnissaanut Demokraatit tapersersuinerminnik oqariartuuteqarnerisa kingorna, Arctic Circle Business kiisalu partiit Siumut, Inuit Ataqatigiit, Atassut, Demokraatit, Partii Naleraq immikkoortoqarfii ataatsimut qisuariaateqarput.

- Kangerlussuup mittarfissuartut atuutiinnarneratigut nuna tamakkerlugu takornariaqarnikkut ineriartorneq qulakkeersinnaavarput. Oqariartuutigaarput Qeqqata Kommunia nunatsinni takornariaqarfiit annerpaat aappaatut pingaartinneqassasoq isiginiarneqarlunilu, partiit aamma inuussutissarsiortut kattuffiat taama allapput.

Piffimmi takornariaqarneq aserorneqassasoq

- Taamaattumik isumaqatiginngilluinnarnarput Kangerlussuaq siunissami heliportinngortinneqassappat, qanormi Kangerlussuaq tikinneqartalissagami? Piffimmi takornariaqarneq aserorneqassaaq, naak takornariaqarnikkut ineriartortitat suliallu annertusiartoraluartut maannamullu unnuisarfiit amerliniarlugit aningaasaliiniartut pilersaarutaagaluartut.

Sisimiut Kangerlussuullu akornanni aqqusinniornissaq kiisalu Kangerlussuarmi talittarfiliornissaq Qeqqata Kommuniani partiit pingaarnerpaatut isigigaat naqissuserneqarpoq.

- Taamaattumillu Naalakkersuisut siuliisa kiisalu Qeqqata Kommunia isumaqatigiissutaat malillugu sulineq ingerlateqqissagaat kaammattorusuppagut. Taamanikkut angallannermut Naalakkersuisuusoq Erik Jensen kiisalu borgmesteri Malik Berthelsen isumaqatigiissuteqarnikuummata, taakku allapput.

Takornariarfissaq nukittunerulersoq

Ataatsimoorlutik oqariartuuteqartut erseqqissaatigaat, Kangerlussuup takornariaqarnikkut ineriartornera aamma siuarsarneqaqqissasoq, sermersuup nunatarujussuata ilaa ilanngullugu eriagisassatut ilanngunneqarmat, tamannalu Kangerlussuarmit tikinneqarsinnaareerpoq, Kalaallit Nunaanni kisiartaalluni, takornarissat sermeq ingerlaarfigisinnaammassuk, attorlugu, taavalu pisulluni sermersuarmukartarnerit periarfissaallutik.

- Qularutissaanngilaq nunataq takornarissanut ornitassatut nukittuumik inisseqqiinnarmat, Kangerlussuullu iluaqutigilluassavaa. Arctic Circle Trail nunarsuarmi ilisimaneqarlualernermigut takornarissanik amerlanerujartuinnartunik aqqutigineqartarpoq sulilu annertunerusumik pisulluni takornariarnissamut periarfissat annertupput. Takornarissat Kalaallit Nunatsinnik misigisaqarusuttut, Kalaallit Nunatta ukiunik 4500-it sinnerlugit pisoqaassuseqartup oqaluttuarisaanera misigisinnaavaat, qimussinik misigisassarsiorlutik, sermersuaq, kuussuit, arsarnerit, amerikkarmiut oqaluttuassartaat, nunataq uumasunik nujuartanik ulikkaartoq, tuttut, umimmaat allallu.

Periarfissanut killiliisoq

- Tamatuma saniatigut nunataq annertuunik periarfissiisoq ilisimavarput ilisimatusarnikkut suliat kiisalu inuussutissarsiornikkut aalisarnikkut, nunalerinikkut piniarnikkut aalisarnikkullu ineriartorfissaqarluartoq. Taamaattumik nungusaanata ineriartortitsinissamik oqariartuuteqarpugut. Maannami siunnersuutigineqartut Qeqqata Kommuaniata aatsitassarsiornikkut periarfissat eqqarsaatigalugit killiliisuussapput.

Sisimiunit oqariartuuteqartut naapertorlugit missinnaassusermi malunnaatilimmik ajorseriartoqassaaq aamma amerlasuut sivisunerusumik angalasalissallutik.

- Inuussutissarsiuteqartut nioqqutissanik tikisitsiniarnerminni aamma nassiussiniarnerminni attaveqaqatigiinnermik ingerlalluartumik pisariaqartitsipput, tamanna aamma ajorseriassaaq.

Attassinissamut tapersersuisut

- Tamannalu Inatsisartut Naalakkersuisullu eqqumaffigisariaqarpaat, tassami aalajangiinerit pigaluttualersut Nunatsinni takornariaqarfiit ornigarneqarnerpaat aappaat eqqornerlorujussuarsinnaavaat. Taamatut oqaaseqarluta Qeqqata Kommuniani kommunalbestyrelsip.ataatsimoortup Kangerlussuup mittarfissuartut ataannarnissaanut suliniarnera taperserparput, ataatsimut taama oqariartuuteqartoqarpoq.