Piffissamut kiffartuussinermut isumaqatigiissuteqarfiusussamut tullermut suliassat pilersaarusiorneqarlutik aallartinneqarnissaannut Inatsisartuni Naalakkersuisunilu ilaasortat 6.-7. oktober 2018-imi Attaveqaatit pillugit Isumasioqatigiinnissamut qaaqquneqarput.

Attaveqaqatigiinnermut Naalakkersuisoq Simon Simonsen Sara Olsvigimut paragraf 37 naapertorlugu akissuteqarluni taama paasissutissiivoq.

Tassani allassimavoq isumaqatiginninniarnerit suli aallartinneqarsimanngitsut.

Aningaasaqarnikkut sinaakkutit

Angallannermut kiffartuussinissamut isumaqatigiissutissat tulliit maanna atuuttunit annertunerusumik innuttaasut pisariaqartitaannut
naammassinninnissaat qanoq qulakkeerniarneqarnersut pillugu apeqqummut Simon Simonsen akissuteqarpoq:

- Naalakkersuisut taamaallaat Aningaasanut Inatsisip akuerineqarnerani aningaasaqarnermut sinaakkusiussassatut Inatsisartunit aalajangerneqartut iluanni kiffartuussinissamut isumaqatigiissuteqarsinnaapput. Aningaasat atorlugit innuttaasunut
iluaqutaasumik annertunerpaamik angallattoqarnissaa  Naalakkersuisut anguniagaraat, akissutigineqarpoq.

Seminar-ertitsinissami Simon Simonsenip neriuutigaa, suleqatigiilluni pissutsit pitsanngorsarneqassasut.