Kruse: Aalisarneq pillugu inatsisissatut siunnersuut kinguartinneqassanngilaq
Raajarniarnerup iluani ingerlatsisut aalisarneq pillugu inatsisissatut siunnersuut kinguartikkusuppaat nassatassai pillugit paasissutissanik amigaateqarneq pissutigalugu. Tamannali Aalisarnermut Naalakkersuisumit itigartitsissutigineqarpoq
Raajarniarneq pillugu isumasioqatigiinnermi KNAPK-mit Sulisitsisunillu sisamanngornermi tallimanngornermilu septembarip 7-ani 8-anilu aaqqissuunneqartumi oqaatigineqarpoq, aalisarneq pillugu inatsisissatut siunnersuutip 2018-imi upernaakkut ataatsimiinnissamut kinguartinneqarnissaa raajarniarnerup iluani ingerlatsisunit kissaatigineqartoq, inatsisissatut siunnersuutip kingunissai immikkoortut ilarpassuini allaaserineqarsimanngimmata.
Atuaruk: Raajat pillugit seminareqarnera neriulluartitsivoq
Aalisarnermut Naalakkersuisoq, Karl-Kristian Kruse, raajarniarnerup iluani ingerlatsisut siunissamut ernummateqarnerannik inatsisissatullu siunnersuutip kingunerisassaanut atatillugu misissuinernik arlalinnik ujartuinerannik paasinnippoq. Kisianni kinguartitsisoqarnissaa misissuisoqaqqinnissaalu itigartitsissutigai.
- Aalisarneq pillugu inatsisissatut siunnersuummi aalajangersakkat nutaat paasissutissanik kingunerisassanillu amigaateqarnerat tunngavigalugu raajarniarnerup siunissaa pillugu ernummateqartornera paasivara. Kisianni qineqqqusaarnerni kingullerni pingasuni partiinit tamanit aalisarnermut nutaamik inatsiseqalernissatta kissaatigineqarsimanera eqqqaamassallugu aamma pingaaruteqarpoq, Karl-Kristian Kruse Sermitsiamut oqarpoq.
Tusarniaanermulli akissutit tusarnaarniarlugit neriorsuivoq.
Tusarniaanermut killigititaq septembarip 22-ata tungaanut sivitsorneqartoq, Sermitsiaq.AG-p ippassaq allaaserereerpaa. Tamatumali siunnersuutip siullermeerneqarnissaa akornusernavianngilaa, novembarip 16-anni pilersaarutaammat.
Tamanna pillugu Sermitsiami paasisaqarnerusinnaavutit, taanna uani ataani linki tooriarlugu pisiarisinnaavat:
