Aalisarnermut inatsisissatut siunnersuutip aalisarnermik inuussutissarsiuteqartut sinaakkutissaat naammattumik eqqarsaatiginngilaa, taama isumaqarpoq Kalaallit Nunaanni Kukkunersiuisut, aalisarnermut inatsisissatut siunnersuutip tusarniaassutigineqarneranut akissuteqarsimasoq.

- Ilaatigut isumaqarpugut siunnersuutip maannakkutut isikkoqartup inuiaqatigiit aningaasaqarneranut kingunissai naammaginartumik misissorneqarsimanngitsut, soorluttaaq inuiaqatigiit aningaasaqarneranut kingunissai pillugit naatsorsuinerit tunngaviusut tusarniaasutut naatsorsuinerit piviusorsiortuunerannik nalilersuisinnaalersitsisumik allaatigineqanngitsut, kukkunersiuisoq Per Jansen Kalaallit Nunaanni Kukkunersiuisut sinnerlugit allappoq.

Suliffeqarfiit pisortanit pigineqartut (Royal Greenland, aaqq.) pisassiissutit tunngaviannik annikillisaavigineqanngitsut Kalaallit Nunaanni Kukkunersiuisut maluginiarpaat. "Inatsisissatut siunnersuutip oqaaseqaataani tunngavilersuuteqanngitsumik ingerlatsiviit assigiinngitsunik malittarisassaqarnissaat" naleqquttuunngitsoq kukkunersiuisut isumaqarput.

Piviusorsiorneq

Umiatsiaararsorlutik aalisartut aalisakkerivinnilu sulisut ikilisarnissaat, taamaalillutik allamik suliffissarsiortariaqartunngornissaat, aalisarnermut inatsisip nutaap siunertaasa ilagaat.

- Inatsisiliortut tamatuma kinguneri pillugit unneqqarilluni paasissutissiineri pitsaasuuvoq, kisianni inuit eqqugaasut inatsisip oqaaseqaataani allaatigineqartutut suliffinnut allanut ingerlaannaq nuutsinneqarsinnaanerisa piviusorsiornera nalilersinnaajumallugu tunngavissaqanngilagut, allassimavoq nangillunilu:

- Inatsisiliortut qanoq ilillutik pisariaqartinneqaraluarpat ilinniartitseqqinnissaq tapersersorumaarneraat aamma ilaqutariit suliffissarsiorlutik nuuttariaqartut assersuutigalugu ineqartinneqarsinnaanerat qanoq qulakkeerneqassanersoq nassuiarneqanngilaq.

Kalaallit Nunaanni Kukkunersiuisut nassuerutigaat, ingammik sinerissap qanittuani raajarniarnermi, pisassiissutit ukiut ingerlaneranni aalisartunut ikittuinnarnut tunniunneqartarsimasut, kukkunersiuisulli erseqqissarpaat, ingerlatsiviit aningaasarsiatik aalisariutinik nutaaliaasunik pisinermut atortaraat, taamaalillutik aalisarneq pitsaasoq qulakkeertarlugu, taamaalillunilu akitsuutinik, akissarsianut akileraarutinik suliffeqarfinnullu akileraarutinik annertuunik akileraartarnikkut tamanna nunamut iluaqutaasartoq.

Naalakkersuisut isumaqatiginngikkaat

- Avatangiisinut qanittumi raajartassiissutit taama amerlatigisut inuiaqatigiinni naligiinngissuseqalersitsisimasut Naalakkersuisut oqarnerat isumaqatiginngilluinnarparput. Akerlianilli isumaqarpugut aalisarneq pitsaanerujartortillugu aalisarneq inuiaqatigiit aningaasaqarnerannik annertunerusumik tapersersuissasoq, tusarniaanermut akissummi allassimavoq, tassanilu inerniliunneqarpoq pisassiissutit siammarternerisigut aalisarneq pitsaannginnerulissasoq, tamannalu inuiaqatigiinni aningaasaqarnermut kinguneqassaaq.