Siunnersuisartoqatigiit peqatigiiffimmi Kalaallit Meerartaannit siulersorneqartut, kiisalu Danmarkimi isumaginninnikkut aaqqissuussineq pillugu kalaallisut qallunaatullu paasissutissanik ineriartortitsinissamut aningaasat “naammassineqareerput kommunillu atornissaannut piareerlutik”, isumaginninnermut ministeri Pernille Rosenkrantz-Theil IA sinnerlugu folketingimut ilaasortamut Aaja Chemnitzimut ilisimatitsivoq.

Isumaginninnikkut sulianik suliarinninnermi kommunit kalaallit ilaqutariit oqaatsitigut kulturikkullu tunuliaqutaat eqqarsaatigisariaqarpaat, tamatumunngalu atatillugu piffissami 2024-miit 2027-mut 7,8 millionit koruuninik immikkoortitsisoqassasoq isumaqatigiissutigineqarsimavoq. Aningaasat taakkua atorlugit suliniutit marluk taakku suliarineqarput.

Peqatigiiffiup Kalaallit Meerartaasa immikkut ilisimasatik kommuninit naammattumik atorneqarneq ajorneranik Sermitsiap allaaserinninnera, Aaja Chemnitzip ernumanartoqartippaa.

Kommunit namminneq aqutsinerat

- Ilaqutariinni kalaaliusuni angerlarsimaffiup avataanut inissiinissamut suliani Peqatigiiffik Kalaallit Meerartaat eqqartuussisunut akuliunneqartassasoq ministerip qulakkeerniarpaa, folketingimi ilaasortaq aperivoq.

Kommunit namminneq aqutsinerat tassaasoq „inatsisit sinaakkutaat malillugit sulianik aaqqissuussinermik paasissutissiinermillu kommunit namminneq akisussaaffillit“ isumaginninnermut ministeri akissummini erseqqissaavoq.

- Allaaserisami apeqqutip innersuussutaani peqatigiiffiup "Kalaallit Meerartaat"-sa kommunit qanittukkut akuliunneqarnissaat isumalluarfigigalugu paasissutissiisimasoq maluginiarpara, ministeri akissummi taama allappoq.