Ataqatigiissaarinermik, siuariartornermik aamma politikikkut suliat naammassineqarnissaanut eqeersimaartumik pingaartilluarneqarnissaannik ukkassisumik angusaqarluarniartumik Naalakkersuisut Siulittaasuata Naalakkersuisoqarfia allaffimmi pisortassarsiorpoq.

- Naalakkersuisut ataqatigiissaarneqarnerannut allaffik nutaaq pilersinneqartoq Aqutsisunut allattoqarfimmi inissinneqassaaq.

Akisussaaffiit

Naalakkersuisuni aamma qitiusumik aallaffeqarfimmi politikikkut ingerlatsinernik sulianillu suliaqarnermi pingaarnertut aamma pilersaarusiornermut tunngasut ineriartortinnissaat nukittorsarnissaallu naalakkersuisut ataqatigiissaarneqarnerannut allaffimmi pisortap akisussaaffigissagai paasissutissiissutigineqarpoq.

- Suliassat naammassisinnaajumallugit naalakkersuisoqarfiit allat qanimut suleqatigisariaqassavatit. Taamaalillutit suliffeqarfik tamaat naalakkersuisoqarfinnit pisortat qanimut suleqatigalugit tapersersussavat, allassimavoq.

Naalakkersuisut Siulittaasuata Naalakkersuisoqarfiani pisortaq Simigaq Broberg toqqaannartumik pisortaralugu allaffimmi pisortartaaq tassunga attaveqassaaq. 

Suliassat makkuupput:

• Allaffik ingerlalluartoq kajumittunik suliamullu pikkorissunik sulisulik pilersissallugu
• Suliani pingaartinneqartuni ataqatigiissaarinerup siuariartornerullu nukittorsarnissaa siunertaralugu, Naalakkersuisut politikkikkut oqaluuserisassaannut eqeersimaartumik pilersaarusiornikkullu tamakkiisumik isiginninneq pilersissallugu allanngutsaaliussallugulu
• Naalakkersuisut aamma qitiusumik allaffeqarfik akimorlugit pingaarnersiuineq ataqatigiissaarinerlu nukittunerusoq tapersersussallugu
• Pilersaarusiornermut tunngasunik aamma politikkikkut suliani pingaarutilinni ingerlanerinilu naalakkersuisoqarfiup pisortaa tapersersussallugu
• Nalinginnaasumik ingerlanerup paasineqarnissaa pillugu kiisalu aaqqissuusseqqinnernik politikkikkullu isumaqatigiissutinik suliaqarnermi naalakkersuisoqarfiit allat isumasioqatigisassallugit.

Marluinnik oqaaseqarnissaq

Kalaallisut qallunaatullu marluinnik oqaaseqarnissaq erseqqissarneqarpoq. Qinnuteqarnissamut killigititaq tassaavoq marsip aqqaneq-aappaat.

Sermitsiaq.AG-mi atorfik pillugu allagarsiussaq takuuk