Sofia Geislerip 24. juli pargraf 37 naapertorlugu apeqquteqaatimi akineqarsimannginnera eqqumiigivaa. Naalakkersuisut ullut suliffiusut qulit qaangiutsinnagit akissuteqassallutik pisussaaffigaat, piffissaliunneqartorlu angumerisinnaanngikkaanni apeqquteqartumut allagaqarluni nalunaarutiginnittoqassaaq.

Tunngavilersorneqanngitsoq

- Paragraf 37 naapertorlugu apeqqutit maannamut suli akineqannginnerannut suna patsisaanersut suli tigusimannginnakku eqqumiigivara, aammalu eqqumiigalugu akissutaasut qaqugu tigunissaat naatsorsuutigisinnaaneriga ilisimatitsissutigineqanngimmat. Naak akissutissap tunniunneqareersimanissaanut piffissaliussat ullut suliffiusut qulit kingorna ullut suliffiusut allat arfineq-marluk ingerlareerneranni Inuit Ataqatigiit Allattoqarfianiit marloriarluni apeqqutigineqareeraluartoq, Sofia Geisler tusagassiuutinut nalunaarummi allappoq.

Ukiup nutaap aallartinneraniit 203-it apeqqutigineqarsimapput, ukiullu naanissaata tungaanut apeqqutit taama amerlatigiinnassappata katillugu 372-it apeqqutigineqassapput. Taamaalisoqassappallu 2015-imi katillugu apeqqutigineqarsimasut 302-t qaangerneqassapput. Sermitsiaq.AG-p naatsorsuinerata tamanna takutippaa.

Apeqquteqarusunneq

Piffissami 26. februarimiit 17. maj tikillugu apeqquteqaatip ataasiinnaasimanera eqqarsaatigigaanni qaammatini kingullerni sisamani apeqquteqaatit amerlangaatsiarput. Piffissami tassani apeqquteqartoqarsimannginnera Inatsisartunut qinersisoqarneranik pissuteqarpoq.

Inatsisartuni illuatungiliuttut amerlanerusinnaanngillat, tamannalu apeqquteqarusunnermut nassuiaatissaalluarpoq, tassani paasisaqarusunneq naalakkersuisunulli unammillersunneq pissutigineqartarput.

Taama amerlatigisunik apeqquteqartoqarsimanera sulisunut qanoq kinguneqarsimanera pillugu Sermitsiaq.AG-p Naalakkersuisut Siulittaasuata Naalakkersuisoqarfiani pisortaq Søren Hald Møller oqaaseqartinniaraluarlugu iluatsinngilaa.