Nanortalimmi eqqaanilu ulloq tamakkingajallugu avammut attaveqarsimanngillat. Oqarasuaatit, radio TV, aammalu imarsiortunut radio atorsinnaasimanngillat. Internetti suli iluarsineqarsimanngilaq. Tele-Post tusagassiuutinut nalunaarummmi taama allappoq.

Stationeqarfiup Nanortallip avannaaniittup nunatta  kujaterpiaani internetti ullaarli sunnersimalerpaa.

Tele-Post ulloq tamaat teknikerinik stationeqarfimmukartitsiniaraluarpoq, silarlunnerali pissutigalugu tamanna iluatsinngilaq.

- Teknikerit stationeqarfimmut apuutsinniarnerat ullumikkut ajoraluartumik iluatsinngilaq, aqaguli misileeqqissaagut. Ualeq mannali atortulersuutigut allanngortippagut, taamaalilluni sumiiffimmut sumiiffimmiillu sianertoqarsinnaalerpoq. TV, radio aammalu imarsiortunut radio taamatuttaaq atorsinnaanngoqqipput. Sumiiffimmi internettimik kiffartuussinerit ajornartorsiutip aaqqinneqannginnerani suli kipisaqattaarput, Teknikkimut IT-mullu pisortaq Jonas Hasselriis oqarpoq.