Nipilersoqatigiit Suluit, tassaasut kalaallit erinarsortartut Karina Møller, Nukâka Coster-Waldau, HH Suersaq aamma Ilannguaq Lumholt, pattattuallu Kristoffer Jul Reenberg, piumaneqarluarput.

Aamma nunanit allani. 

Ornigassaat tulleq tassaavoq San Francisco. Suluit Amerikami illoqarfissuarmi tassani nunat tamalaat akornanni silap pissusaa pillugu ataatsimeersuarnermut atatillugu katersuiniartoqarnerani akissarsiaqaatiginagu septembarip 14-iani tusarnaartitsissapput. Aaqqissuussineq tusagassiorfimmi Sermitsiaq.AG-mi tusagassiortumi Jensine Berthelsenimit malinnaavigineqassaaq, silallu pissusaata allanngortoriarnerata nunat inoqqaavinut sunniutai immikkut allaaserineqassallutik.  

Suluit UNESCO-p nunarsuarmi arnat ulluannik aaqqissuussineranut atatillugu Parisimi tusarnaartitsisoqarnerani marsimi 2018-imi pilersinneqarput.

Nukâka Coster-Waldau oqaluttuarpoq, Suluit tusarnaatitsinermik aaqqissuussinermut Kalaallit Nunaat sinnerlugu peqataanissamut immikkut qaaqquneqarsimasut najugaqarnerallu FN-ip ineriartortitsinermut aningaasaateqarfianit UNDP-mit akilerneqassasoq, soorluttaaq Air Greenland ikiuussimasoq. Suliniulli aningaasaqarneq eqqarsaatigalugu nipilersoqatigiinnut eqqarsarnartuuvoq.

- Ullormusiassanut akissarsiaasinnaasunullu tapiissutinik qinnuteqarsimagaluarpugut maannamulli iluatsitsinata. Qinnuteqarfigisatsinnit marlunnit itigartinneqarpugut qinnuteqaatinillu pingasunit allanit akissutisinissamik utaqqilluta. Angalanerup uatsinnut aningaasartuutaannginnissaa neriuutigaarput, Nukâka Coster-Waldau oqarpoq. 

Katersuiniarnermut atatillugu tusarnaartitsinermi rockimik nipilersortartut tusaamasat ilaatigut Patti Smith aamma Bob Weir tusarnaartitsissapput. 

Suluit aalajangersimasumik nipilersoqatigisartagaat, Ilannguaq Lumholt, peqataasinnaanngilaq, tusarnaartitsinermilu percussionertartumit Peter Klitgaardimit taarserneqassalluni.