Piffissap ikaarsaariarfiusup upernaap tungaanut ingerlasussap ingerlanerani suliffeqarfissuup aqutsineq, ingerlatsineq ineriartortitsinerlu piginnittuusimasunit Tuuta Lynge Knudsenimit aamma Jakob Knudsenimit tigujartuaassavaat.

Oqaluttuassarpassualik kusanartorlu
- Hotel Hvide Falk akunnittarfiuvoq kusanartoq, oqaluttuassarpassualik anersaalillug kiisalu kusanarluinnartumik inissisimasoq, Søren Rasmussen, Albatros Greenlandimi pisortaasoq oqarpoq, Abatros Tvavel angalatitsivissuuvoq Københavnimi qullersaqarfeqartoq.

Nunanit tamalaanit takornarissanit Ilulissat Kangerluani sermimik iigartartumik takunnikkusuttut amerliartuinnarnerisa akunnittarfiup pisiarinissaanut aalajangiisuuvoq.

- Ilulissat UNESCO-mit eqqissisimatitamik sermimik iigartartumikk aniasoqartoq illoqarfiuvoq nuannarineqartoq, tamannalu takornariarpassuit ukiut tamaasa misigisarpaat. Akunnittarfik sulisuilu piginnaasagissut nunaqavissullu Ilulissaniinnaanngittoq takornariaqarnermik ineriartortitsinermut peqataaginnarnatik aamma Kangerlussuarmi Albatros Arctic Circle peqatigalugu ineriartortitsissaaq, Søren Rasmussen ilisimatitsivoq.

Akunnittarfimmi 38-nik ineqarpoq qulingiluanillu inissiaqarluni, taakkua amerlanerpaartaat Qeqertarsuup Tunuanut kusanavissumik isikkiveqarput.

Unnuinissaq piumaneqarluartoq
Illoqarfimmi takornarianit ornigarneqarluartumi akunnittarfimmi inissat tatisimaneqartartut, aningaasaqarnermut pisortaq Martin Berg ilisimatitsivoq.

- Pisisartutta akunnittarfimmi Ilulissani unnuinissaannik neqeroorfigisinnaanissaat pisariaqartittorujussuusimavarput. Nunanit tamalaanit tikeraartutsinnut akunnittarfiup sinittarfii atorlugit piffissap takornariartitsiffiusup sivitsorneqarnissaa naatsorsuutigaarput, Martin Berg ilisimatitsivoq.

Danskit angalatitsiviata pisinerup kingorna illoqarfimmi sammisassat angalatitsinernik allanillu naatsorsuutigaa.

Maanna akunnittarfimmi oqaluttuassartaqarluartumi sulisut suliinnarnissaat naatsorsuutaavoq. Akunnittarfiup qanoq akeqarnera ilisimatitsissutigineqarusunngilaq.