Nunaqarfik ineriartorfiusoq
Suliumassuseqarneq Innaarsunnut iluaqutaasoq
Aalisarnermi atuagassarititaasut pitsaasut siuarsaanerlu pitsaasumik ingerlasoq pissutaallutik inuttusiartornermik isertitallu agguaqatigiissillugit qaffannerannik kinguneqarpoq.
Innaarsunni aalisarnermik inuussutissarsiuteqarneq suli siuariartorpoq. Innaarsunni aalisartut piniartullu peqatigiiffiannit nunaqarfimmilu aqutsisunit Innaarsuit siunissaat ernumanartoqartinneqanngilaq, Sermitsiaq allappoq.
Nunatsinni inoqutigiit isertitaasa agguaqatigiissinneranni ukiuni kingullerni Innaarsuit isertitaqarnerpaat pingajuattut inissisimapput - taamaallaat Nuummit Kangerlussuarmillu qaangerneqarlutik. Taamaalillunilu nunaqarfik isumannaatsumik inissisimalluni, tamatumunngalu qaleraleqarluarnera, angallannikkut periarfissat pitsaasuunerat tunitsivigissaarnerlu pissutaapput.
Ingerlalluartut
Ukiut ingerlanerini Innaarsunni aalisarneq aalisartunut eqeersimaartunut atugarissaarfiusumik ingerlavoq. Naak qaleraleqarluaraluartoq silap pissusaata allanngoriartornera aalisarnermut sunniuteqarnerluppoq, sikumi saannerulerpoq aalaakkaasuujunnaarluni. Qilalukkanik killilersuinerujussuup malitsigisaanik qilalukkat amerleriarput. Pissutsit tamakku kingunerisaannik qalerallit aalisarfiusunit qimagussulerput, ingasammik ukiaanerani.
Tamakku Hans Mathias Kristensenimit, Innaarsunni aalisartut piniartullu peqatigiiffianni 70-it missaanni ilaasortalimmi siulittaasuusumit oqaatigineqarput. Aalisartut piniartullu peqatigiiffiannit aqutsiveqarfik Upernavimmi qilalugartassat qaffanneqarnissaat arlaleriarluni kissaatigineqartaraluarpoq, tassami sinerissap qanittuani aalisartut, aalisarfimminni qilalukkat ingerlaartut akornutigalugit, isertitassaminnik annaasaqaatigileramikkit.
Aalisariutaatillit amerlanngitsut
Aalisartut piniartullu peqatigiiffianni ilaasortani 70-it missaanniittuni tallimat kisimik aalisariutaateqarput.
– Siusinnerusumi Innaarsunni aalisariutit aqqaneq-marluk missaanniikkaluarput, ukiulli ingerlanerini ikiliartuinnavissimallutik Poca 600-t sakkortuunik motorillit atornerilu akikinnerusut ornigineqarnerummata, Hans Mathias Kristensen, nammineerluni 10 meteriusumik AWI 33-mik taaguutilimmik aalisariutaateqarnikoq, oqarpoq.
Allaaserineqartoq aviimi Sermitsiami tamakkiisumik atuaruk. Aviisi uani pisiarineqarsinnaavoq: