Kalaallit Nunaanni Eqqartuussiviit Nuummi allaffeqarfiata pisortaata Kasper Skarep ulloq apriilip 4-ani inuunini annaasimasinnaagaluarpaa, Maniitsup kangiani sermip quppaanut nakkarami. Aviisi AG taama allaaserisaqarpoq.

Ammut 15 meterit killillugillu nakkarnera unippoq aput ikaartarfittut amitsigisoq tuffigigamiuk. Quppaq angutip ataani naaffeqanngiusartutut itissuseqarpoq.

Kasper Skare qujanartumik Nuummi sisorartartoqatigiinnik peqateqarsimavoq, taakkunanngalu ikorneqarallartilluni annassinnaasimalluni, pisoq ulorianarluinnartoq qisuariarfigalugu tamakkiisumik iliuuseqarlutik annaassiniaanermik aallartitsimmata.

Tassani paasineqarpoq:

• Timaa aarlerinartumik nillorsimasoq
• Tunersuani saarngit pingasut napisimasut
• Puai marluullutik pullaarsimasut
• Najungasut arfinillit napillutik
• Qutui illugiillutik napillutik
• Qimerlualu pingasunik napineqarluni

Kisiannimi Kasper Skare ullumikkut qanoq ippa – qaammatit sisamat affaatalu qaangiunneranni?

- Ajutoornerup kingorna piffissap sinnera aamma susoqarsimanera eqqarsaatigissagaanni ajunnginneruvunga. Suli tarnikkut akornutissarsisimanngilanga aamma ajoqusernikka suliffinnut tunngatillugu akornutiginngilakka, Kasper Skare oqaluttuarpoq.

- Timikkummi ajoqqusernitit?

- Suli tuinnik, pingaartumik saamerlermik, ilungersuuteqarpunga. Taamaattumik suli Sanami fysioterapeutiliartarpunga. Tuikka oqimaannerulaamik atorsimagaanngakkit annernartarput. Aamma tuima piginnaassusiat aalassarissusiisalu ilaat annaasimavakka. Piffissap ingerlanerani iluarsiartussanersut naluara. 

Kasper Skarep apersorneqarnera tamaat aviisimi AG-mi atuaruk, taanna uani ataani linki aqqutigalugu isissutissarsiffigisinnaavat: 

AG Uge 33 2018

Klik her for at læse