Nunatta Qitornaanit qinigassanngortittoq tunngaviligaanngitsumik soraarsinneqartoq
Aggu Bentzen Qaqortumeersoq, Nunatta Qitornaanit Inatsisartunut qinigassanngortittoq, ilinniarsimanngitsutut ikorfartuisutut atorfimminit oqaasiinnakkut soraarsinneqarpoq. Soraarsinneqarnini nuliaminit aamma tassani suliffeqartumit tusarpaa. Taanna Inatsisartunut qinigassanngortinnini pissutigalugu soraarsitaasutut misigisimavoq.
Partiip Nunatta Qitornaasa Inatsiartunut qinigassanngortitaa Aggu Bentzen Qaqortumeersoq, meeqqat inuusuttullu annertuumik tarnimikkut timimikkullu innarluutillit angerlarsimaffianni ‘Ivaaraq’-mi ilinniarsimanngitsutut ikorfartuisutut atorfimminit soraarsinneqarpoq.
Taassuma tamanna Sermitsiaq.AG-mut oqaluttuaraa.
- Inatsisartunut qinersinissamut qinigassanngortikkama, Inatsisartunut qinigassanngortinnera pissutigalugu ullut peqanngiffissakka angerlarsimaffiup ullorsiutaanut allappakka, Aggu Bentzen oqarpoq.
Aggu Bentzenillu oqarnera naapertorlugu, ulloq unnuarlu angerlarsimaffimmi ’Ivaaraq’-mi sulisut ullut sulinngiffeqarfigerusutatik nalunaarsortarnissaat ileqquullunilu pisussaaffiuvoq.
- Taamaakkaluartoq suliartoqqissanngitsunga nalunaarfigineqarpunga. Nuliannit tassani aamma suliffeqartumit oqarfigineqarlunga nalunaarut taanna pivara, taanna oqarpoq, nangillunilu:
- Inatsisartunut qinigassanngortinnera pissutigalugu soraarsitaallunga misigisimavunga. Nikanarsarniarlunga soraarsinneqarlunga.
Forstanderiugallartoq: Suliaq malittarisassat malillugit ingerlavoq
Ulloq unnuarlu angerlarsimaffimmi ‘Ivaaraq’-mi forstanderiugallartoq, Kaalat M. Kardelip oqarnera naapertorlugu, Aggu Bentzen pillugu suliaq malittarisassat naapertorlugit ingerlasimavoq.
- Tunngaviusumik sulisut pillugit suliani tusagassiorfitsigut oqaaseqarneq ajorpugut. Pineqarneq taartaammat aamma qaammat ataaseq ataallugu sulisimammat suliaq malittarisassat naapertorlugit ingerlavoq, taanna oqarpoq.
