Spiralilersuisimanerit nalunaarutigineqartut, Nunatsinni Nakorsaaneqarfiup ilisimasaqarfigisai 1991-illu kingorna pisimasut, spiralilersuinerit pillugit suliami aallaqqaammut spiralilersuisimanermeersunit allaanerupput, Nunatsinni Nakorsaaneqarfiup nalunaarusiaani taama allassimasoqarpoq.

- Arnat inuusuttuaqqat inersimasullu 1992-imi Peqqinnissaqarfiup nunatsinnit tiguneqarneraniit, piffissami siullermi amerlasuunit oqaluttuarineqartutut, spiralilersinnissaq imal. allatigut pinngitsaaliissummik naartunaveersaaserneqarnissaq siunertaralugu aggersarneqarsimaneq pillugu nalunaarutinik tigusaqartoqanngilaq, Nakorsaaneqarfik allappoq.

Ikinneerarsuupput

- Suliani nutaajunerusuni akuersisitseqqaarani spiralilersinnerup imal. allatigut naartunaveersaaserneqarnerup, naartuersinnermut atatillugu pisimaneranik oqaluttuat amerlanerujussuupput. Piffissami siullermi (1966-1991) pisunut sanilliullugit, piffissami kingullermi pisut (1992-2023) pillugit nalunaarutit ikinneerarsuupput.

Taamanikkut peqqissutsimut naalakkersuisuusup Mimi Karlsenip arnat 1991-ip kingorna akuersissuteqaratik spiralilertinneqarsimasut Nunatta Nakorsaaneqarfianut saaffiginneqqullugit kajumissaarneqarnerat tunngavigalugu taama aalajangertoqarpoq.

Ukioq ataaseq qaangiuttoq Nakorsaaneqarfiup nalunaarusiaani killiffik ima allaatigineqarpoq:

• 2022-imi decembarimiit suliat qulingiluat Nunatsinni Nakorsaaneqarfimmut nalunaarutigineqarput.
•  Maalaarutit pisoqqat sisamat Nunatsinni Nakorsaaneqarfiup allagaatinut toqqorsiviini nassaarineqarput.
• Marluk tusagassiorffinnit taamaallaat ilisimaneqarput.

Suliat marluk uninngasut

- Taamaalilluta 1991-ip kingorna pisimasut pillugit suliat katillugit 15-it ilisimavagut. Taakku saniatigut sulianik allanik marlunnik, tunngaviusumik paasissutissat amigaataammata annertunerusumik qulaajaavigineqarsinnaanngitsunik tigusaqartoqarpoq, peqataasullu attavigineqarsinnaasimanatik, tamanna Nunatsinni Nakorsaaneqarfiup Naalakkersuisunut nalunaarusiaani allassimavoq.

Sulianit 15-iusunit 13-init suliaritilluni naartuersinnermut atatillugu pisimapput, sulianilu kingullerni marlunni siulleq, aaqartarnerup akornuteqarnera pissutigalugu nakorsaatitut hormonitalimmik spiraliliisoqarsimavoq, aappaanilu ernereernerup kingorna spiraliliisoqarsimalluni.

Aamma atuaruk: Spiralilersuisimaneq pillugu nunani tamalaani isumaqatigiissutinik unioqqutitsinerit qulaarneqassasut

Misissuinerup inerneri uku nalunaarutigineqarput:

• Suliani 15-ini, allattugaatit naapertorlugit, tallimani akuersisoqarsimavoq ataatsimilu akuersisoqarsimanera ersarinnani. Suliat tallimat akornanniippoq ataaseq tusagassiorfinnit taamaallaat ilisimaneqartoq, kisiannili allattugaatini nalunaarsukkat issuaavigineqarlutik.
• Suliani tallimani allattugaatit nanineqanngillat (taakkunannga ataaseq tusagasiorfitsigut sammineqartoq, allattugaatillu ujarneqaratik).
• Suliani sisamani allattugaatinut nalunaakkamik akuersisoqarsimanngilaq (malaarutit)
• Suliami ataatsimi naartunaveersaat isumaqatigiissutaasumit allaanerusoq atorneqarpoq.

Nalunaarutit

Suliat nalunaarutigineqartut nuna tamakkerlugu sumiiffinnit assigiinngitsuneersuusut ilisimatitsissutaavoq.

Suliat taarsiiffigitinnissamut tunngasut Peqqissutsimut Naalakkersuisoqarfimmit suliarineqartartut Nunatta Nakorsaaneqarfia ilisimatitsivoq.