Ukiup tullianiit Namminersorlutik Oqartussat ingerlatseqatigiiffia Tele-Postip  Ericssonillu Kalaallit Nunaanni tamarmi attaveqaateqarnermut teknologii aammalu antennenut atortut ledningeqanngitsut atorneqalernissaannik suliaq aallartissavaat.

- Pilersaarut Mobile Firstimik taaguuteqarpoq, taassumalu Kalaallit Nunaanni angallattakkanut attaveqaatit
Silarsuarmi pitsaanerpaanut akuutilissavai, attaveqatigiinnermut ingerlatseqatigiiffik tusagassiuutinut nallunaarummi allappoq.

Suleqatigiinnissamut isumaqatigiissut illuatungeriinnit ullumi tallimanngornermi atsiorneqarpoq.

Internetti sukkanerusoq

- Teknologii ledningeqanngitsumik ingerlasoq atorlugu, sullitatta, aamma illoqarfinni nunaqarfinnilu minnerusuniittut, internetimik atuineq sukkaneq atugarilissavaat, pilersaarutillu tamanna siunertaraa. Kalaallit Nunaanni tamarmi teknologiimik pitsaanerusumik atugaqalersitsinissaq Tele-Postip anguniagaraa, pilersaarullu manna tamatuma ilagaa pingaarutilik, Tele-Postimut siulersuisut siulittaasuat Stine Bosse, tusagassiuutinut nalunaarummi oqarpoq.

Attaveqaatinut kabelit aqqutigalugit qangali atorneqartunut unammillersinnaasut attaviit ledningeqanngitsumik ingerlasut nutaaliaasullu atorneqalernissaat, pilersaarummi matumani siunertaavoq.

- Nunatut Kalaallit Nunaattut ittumi, nunarujussuarmi isorartoqisumi agguataarlutik mikisunik inoqarfippassualimmi, teknologiip ledningeqanngitsumik ingerlasup atorneqarnissaa soorunami piumaneqarnerussaaq. Pilersaarut nunami tamarmi malugineqarsinnaassaaq, aamma nunaqarfinni, taakkumi siulliit ilagalugit teknologiimik iluaquserneqartussaapput, attaveqatigiinnermut ingerlatseqatigiiffik nalunaaruteqarpoq.