Pele: 2019-imi sulinermut ilanngaateqassanngilaq
2019-imi sulinermut ilanngaat eqqunneqassanngilaq.
Aningaasaqarnermut Naalakkersuisoq Pele Broberg ataasinngormat nal. 14.00 2019-imut aningaasanut inatsisissatut siunnersuut saqqummiunnerani taama paasissutissiivoq.
Qarasaasiakkut unammilligassat
Namminersorlutik Oqartussat maanna akileraarutitseriaaserisaat sulinermut ilanngaasersuisanngimmat isertitallu amerlassusaat aallaavigalugit akileraartitsisoqartarmat aningaasarsitseriaatsip akileraarusitseriaatillu allanngortinneqaqqaarnissaat Pele Brobergip tunngavilersuutigaa.
- Tamatuma allanngortinnissaa annertuumik allaffissornermik malitseqassaaq qarasaasiatigullu annertuumik ineriartortitsisariaqarluni. Taamaammat 1. januar 2020 nallertinnagu sulinermut ilanngaammik eqqussisoqarnissaa piviusorsiortuunngitsoq, aningaasanut inatsimmi allassimavoq.
Tamanut atuutissagunanngitsoq
Sulinermut ilanngaat tamanut atuutinneqarnissaa Naalakkersuisunit ilimagineqanngitsoq, allassimavoq.
- Innersuussutigineqarpoq akissaatikinnerit immikkut ukkatarineqassasut tikisitanillu pisariaqartitsineq annikillisarniarlugu inuit tamakkiisumik ilaannakoortumilluunniit sulilersinniarlugit suliniuteqarfigineqassasut.
Sipaarutitigut aningaasalersuineq
Pilersaarutigineqarpoq, sulinermut ilanngaat sipaarutitigut aningaasalersorneqassasoq, taamaammat ilanngaat 2020-imut aningaasanut inatsimmut kalluaassanngilaq, Pele Broberg paasissutissiivoq.