Peqquserlunnermik suliami Nunatsinnut attuumassuteqartumi pillaatissiinerit sakkortuut
Eqqartuussissuserisunut Johan Schlüter Advokatfirmameersunut suliami ingammik eqqartuussissuserisunut marlunnut sakkortuumik pillaasoqarpoq.
Suliffeqarfimmi Johan Schlüter Advokaterimi eqqartuussissuserisut, filmiliortut aamma tv-liortut piginnittussaatitaanerminnit aningaasarsiaannik aqutsisuusimasut, ukiuni arlalinni paarnaarunneqassapput. Taakku atuisut aningaasaataannik tigusisimasutut pisuutinneqarput.
Kalaallit Nunaanni imermik suliniummik atornerluillutik aningaasat ilarpassuinik toqqortuiniarsarisimagaluartut oqaatigineqarput.
Johan Schlüter ukiuni sisamani paarnaarunneqartussatut eqqartuunneqarpoq, kisianni pillaataa assingusumik pinerluuteqaqqikkuni aatsaat atuuttussaatinneqarpoq. Susanne Fryland, atuisut aningaasaataannik aqutsisuusimasoq ukiuni tallimani qaammatinilu arfinilinni paarnaarussassanngortinneqarpoq, taassuma pillaatini atussavaa.
Lars Halgreen, pisunut annikinnerusunut unnerluutigineqartoq qaammatini qulingiluani paarnaarussassanngortinneqarpoq, taakku pinerluuteqaqqikkuni atussavai.
Johan Schlüter aamma Susanne Fryland aningaasarpassuarnik 100 millionit koruuninit ikinnerunngitsunik tillittutut eqqartuunneqarput. Taakku pingasut tamarmik imminut iluaqutserniarlutik aningaasanik tilleriarsimasutut eqqartuunneqarput.
Suliami Nunatsinni suliffeqarfimmik imermik suliaqartumut NAFWA-mut tunngasoq paasiuminaappoq. Taakku eqqartuussissuserisut pingasut ingerlatseqatigiiffimmi piginneqataassuteqarnerarput, tamannalu ilumuunngilaq. Taamaakkaluartoq piginneqataassutigisuusaakkatik aappaminnut nuunniarsarigaluarpaat, taamaalillutik aningaasat peqatigiiffimmut sullitaminnut toqqortorniassagamikkit.
Matumani suliami eqqartuussissuserisut pingasut imminnut iluaqutserlutik tilleriarsimasutut pisuutinneqarlutik eqqartuunneqarput.
Lars Halgreenip aamma Susanne Frylandi eqqartuussut ingerlaannaq suliassanngorteqqippaat. Johan Schlüterip suliassanngortitseqqilluni aalajanginnginnermini eqqarsaqqaarnissamik piumasaqarpoq.
