Pisortap nutaap Kujataa nittarsaatissavaa
Ida Vahl Destination South Greenlandip allaffiani pisortatut atorfinitsinneqarpoq
Kujataani takornariaqarnermik suliniuteqarneq pitsanngorsaavigineqarpoq.
Tassami Destination South Greenland allaffimmi pisortamik atorfinitsitsivoq, tassani 41-nik ukiulik Ida Vahl toqqarneqarpoq. Destination South Greenland tusagassiuutinut nalunaarummi taama allappoq.
- Kujataani takornariartitsineq ataqatigiissoq ingerlanniarlugu paasissutissiiviit nittarsaaviit annerusumik ukioq manna ingerlanneqassapput, tamanna Ida Vahlip suliassaasa pingaarnerit ilagissavaa. Ida Vahlip Kujataa ilisimasaqarluarfigaa, ilisimasatsinnillu tapeeqataanissatsinnut qilanaarpugut, Destination South Greenlandimi siulittaasup tullia, Pitsi Høegh oqarpoq.
- Destination South Greenlandip suli ''Farm Holidays'' ineriartortinniarlugit sulivoq, tassani unaatillit/savaatillit takornariartitsinermik suliaqartut piorsaavigineqarnerat ingerlaqqissaaq.
Aasaq kingulleq Kujataani nunat immikkoortuisa ilaat Qassiarsuk, Igaliko, Tasilikulooq, Sissarluttoq aammalu Qaqortukulooq UNESCO-p nunat eriagisassat nalunaarsorfiannut ilanngunneqarput, takornariaqartitsinermi suliaqartut Ida Vahl ataqatigiisaarisoralugu annertuumik avammut nittarsaassineq Kommune Kujalleq suleqatigalugu suliarisussaassavaat.
