Aalisarnermut inatsisissatut siunnersuut naapertorlugu Polar Seafood piginnittutillu raajanik aalisakkanillu pisassaminnik annertuunik pinngitsaalisamik tunisaqassapput, ingerlatseqatigiiffik naapertorlugu, 500 millionit koruunit 1 milliard koruunillu akornanni nalilinnik. Tamatuma saniatigut aalisakkerinermik suliffeqarfissuaq annaasaqassaaq, Aasianni raajaleriffik matusariaqarmat.

Polar Seafood pinngitsaaliissummillu tunisineq

Inatsisissatut siunnersuutip kingunerisaanik pinngitsaaliissummik tunisineq qanoq naleqassanersoq ingerlatseqatigiiffiup naatsorsorpaa:

Raajat pisassiissutigineqartut tamarmiusut 8 procentii

Avataasiorluni qaleralittassiissutit tamarmiusut 8 procentii.

Ilaqutariit Sallingikkut saarullittassiissutigisamik 11,5 procentii tunisariaqarpaat.

- Polar Seafoodip aniguinissaa qularutissaanngilaq, Miki Brøns aamma Bent Salling Sermitsiaq.AG-mut oqarput, tamannali aamma ingerlatseqatigiiffinnut allarpassuarnut, assersuutigalugu Polarip piginneqataaffigisaanut, inuussutissarsiutit attuumassuteqartut mininnagit, sunniuteqassaaq.

-  Ilimaginngisatsitut avataaneersunik aningaasaliisoqarsinnaappat tuniniaanerup Polar Seafood aalajaallisassavaa, Polar Seafoodimi pisortaasut marluk oqarput, kisianni allanik aningaasaliisinnaasunik nassaartoqarsinnaasoq qularaat.

Sassaqqusissut

- Nunatta Karsiata aningaasarpassuarnik akiliinissaanik piumasaqarnissatsinnut tatineqarsinnaavugut, inuiaqatigiillu aningaasaqarnerannut tuttussaammat tamanna kissaatiginngilarput, Miki Brøns aamma Bent Salling oqarput.

Taakku naliliipput "inatsisissatut siunnersuut tunngaviusumik inatsisip immikkoortuanut 73-imut, nammineq pigisanik piginnittuusinnaatitaanermut, tunngaviusumik arlalinnik tunngaveqarluni akerliusoq, tamakkiisumik taarsiissuteqarani pinngitsaaliissummik pigisanik piginnikkunnaarsitsisoqarniarmat".

Aammali pisassiissutit atorunnaarsinneqarneranni agguataarneqarnerannilu suut eqqarsaatigineqartassanersut inatsisissatut siunnersuutip erseqqissumik oqaatiginninnginnera ajornartorsiutaasoq isumaqarput.

Pissaanermik atornerluineq

- Tamanna pissaanermik atornerluinermik kinguneqarsinnaavoq (piumasaqaatit eqqortumik ingerlatsinermut tunngasut), tamannalu erseqqissarneqarpoq inatsisissatut siunnersuutip nassuiaataani erseqqissarneqarmat PSG (Polar Seafood Greenland, aaqq.) inatsisissatut siunnersuummit immikkut eqqugaassasoq, Royal Greenlandili inatsisissatut siunnersuummit eqqugaavallaarnavianngitsoq.

Polar Seafoodip aamma oqaatigaa inatsisissatut siunnersuut Europami Inuit Pisinnaatitaaffii pillugit Isumaqatigiissutinut akerliusoq, tassami ingerlatseqatigiiffiit namminersortunit pigineqartut pisortanillu pigineqartut siunnersuummit immikkoortinneqaramik.

Kitaani raajarniarneq avataasiorlunilu qaleralinniarneq pillugu Royal Greenland A/S pisassiissutinik amerlanerusunik piginnittuunissaa innersuussutigineqarpoq, ingerlatseqatigiiffiit namminersortut pisassiissutinik tunniussinissaat innersuussutigineqarluni.

Assigiinngisitsineq

- Taamatut immikkoortitsineq tunngavissaqanngilaq, taamaattumillu inatsisinik unioqqutitsisumik immikkoortitsineruvoq, Polar Seafood oqarpoq.

Miki Brøns aamma Bent Salling Sermitsiaq.AG-mut erseqqissaapput neriuutigalugu aalisarnermut naalakkersuisoqarfik aalisarnermut inatsisip nutaap suliarineqarnerani ineriartornartumik oqaloqatigissallugu, taamaalilluni inuiaqatigiit aningaasaqarnerat isertitassanik annaasaqarnissaa, nunallu karsiata aningaasartuuterpassuaqarnissaa avaqqunneqarniassammata.