Peqquserutsit (troldkrabber) pisarissersuutaasartutut ilisimaneqartut Nunatsinnut aningaasarsiutaalersinnaanerat Tunumilu suliffissaaleqiffiusumi suliffissanik nunaanik pilersitsinermut iluaqutaasinnaanerat, Polar Seafood Greenland A/S-ip naatsorsuutigaa.

Suliffeqarfik tusagassiutinut nalunaarummi allappoq.

Aasaq manna misileraalluni saattuarniarnissamut umiarsuaatileqatigiiffik 5 million koruunit missaannik aningaasaliivoq.

Japanimiut soqutiginnittut
- Ukiualuit matuma siorna qaleralinniarnermik misileraalluta taama ittunik takusaqarpugut, tassami ilaannikkooriarlutik qassutitsinnut napittarmata. Taamaattumik neriuutigaarput peqquserutsit saattuanik tunisassiornitsinnut tapertarisinnaalissallutigit, Polar Seafoodimi siulersuisuni siulittaasoq Henrik Leth tusagassiutinut nalunaarummi oqarpoq.

Peqquserutsinik tuniniaasarneq suli ineriartortitsiffiusimanngilaq, qanorli soqutigineqartigineri mississorsineqarsimapput, paasinarsivorlu ingammik Japan tunitsivissatut periarfissaalluartoq.

- Misileraalluta aalisareerutta, periarfissat oqaluttuarinissaannut qilanaarpugut, nerioqaagulli inerititaqarluassasoq iluatsilluassallunilu. Iluatsinnissamik kissaateqarluta oqaratta ima paasineqassaaq, aningaasarsiutaasinnaasumik aalisarnissamut tunngaviliinissaq, taamaaliornikkut Tunumi nutaanik isertitsiffissaqalerluni taavalu nunami immamilu suliffissanik pilersitsisoqarluni, Henrik Leth oqarpoq.