Politiit akissarsiaat misissorneqassapput
Kalaallit politiit tunngaviusumik akissarsiaat qallunaanit politeeqataannit appasinnerupput. Akerlianilli ilinniagaqarnermik nalaani akissarsiaqartarput, qallunaat politiinngornit SU-mik pisartut. Maanna Politiforbundip politiit akissarsiaat atorfeqarnermilu atugassarisaat iternga tikillugu misissuiffiginiarpai
Politiforbundip siulittaasua Claus Oxfeldt Nuummeeqqammerpoq kalaallit politiit oqaloqatigiartorlugit, paasiniarlugu sulineranni piumasaqaatit, atugassarisaat aammalu kalaallit qallunaallu politiivisa akissarsiatigut sulinermilu atugassarisatigut assigiinngissutaat.
Sermitsiaq allappoq.
2017-imi Kalaallit Nunaanni Politiit Peqatigiiffiat qallunaallu naalakkersuisuisa ataani Moderniseringsstyrelsen ukiuni arlalinni isumaqatigiinniareersimallutik akissarsianut isumaqatigiissuteqarput. Isumaqatigiissutip kingunerisaanik kalaallit politiit akissarsiaat ukiut tallimat ingerlaneranni 3,8 procentimik qaffanneqartussanngorput. Tamatuma saniatigut nalinginnaasumik suliffiup avataani aggersarneqarnerminni honoratiat qaffanneqarpoq.
Kalaallilli politiit qallunaanit politeeqamminnit akissarsiaat suli appasinnerupput. Moderniseringssstyrelsen naapertorlugu tamatumunnga pissutaavoq pisortat suliffiutaannut allanut sanilliullugu tamanna oqimaaqatigiinngilernermik kinguneqassammat. Taamanikkut Kalaallit Nunaanni Politiit Peqatigiiffianni siulittaasoq Jesper Fleischer naammaginninngilluni oqarpoq Moderniseringsstyrelsen pinngitsaaliisimasoq, illua’tungiillu isumaqatigiinniarsimanngitsut.
Allaaserineqartoq aviisimi Sermitsiami, sapaatip akunnerani matumani saqqummersumi, tamakkiisumik atuarneqarsinnaavoq. Aviisi uani pisiariuk:
