Politiit: Nangikkiartarnerit ima unitsissavagut
Ajunngilluinnarpoq imerniartarfiit ilaat ullaassakkut tallimat tungaanut ammasalissappata. Taava nangikkiartarnerit nakuusernerillu ikinnerulissapput, taamatut isumaqarpoq politimester Bjørn Tegner Bay, taassumalu kissaatiginartippaa imerniartarfiit ataasiakkaat immikkut ammasarfeqalissasut aammalu Sverige-misut pisiniarfiutileqatigiiffimmik naalagaaffimmit pigineqarluni kisermaassisumik, imigassaannavinnik nioqqutilimmik, peqalissasoq
Nangikkiartarnerni inuit aalakoorlutik silaarutaasartarput. Politiillu akulikippallaamik illumi perulluliornernut, paanernut pinngitsaaliillunilu arneriniarnernut orniguttariaqartarput.
AG aviisi taama allappoq.
Nliaminik unataasoq, pinngit saaliisoq allatulluunniit persuttaasoq tamatigungajak aalakoortarpoq. Angerlarsimaffimmilu festernerit amerlasuutigut ullaassanngoriartornerani perulluliorfiulertartut politiit misilittagarilluarpaat.
Sivisunerusumik ammasarfiit
Taamaattumik politimester Bjørn Tegner Bayp kissaatiginartippaa imerniartarfiit sivisunerusumik ammasalernissaat, taamaasilluni nangikkiartartut ikinnerulissammata.
- Isumaqarpunga imerniartarfiit tallimat tungaanut ammasalissappata tamanna ajunngilluinnartoq. Tassami nangikkiarnerit ajortumik kinguneqartarput. Imerniartarfiit sivisunerulaartumik ammasalerpata unnuakkut inunnik, paatsiveqaratik nanginniaqatigissallugit naammattumik aalakoortunik, ujarlertartuerutissaaq, Bjørn Tegner Bay oqarpoq
Malittarisassat eqaannerusut ujartorneqartut
Malittarisassat eqaannerusut, sumiiffimmilu akuersissuteqarnermut ataatsimiititaqalernissaq politiit ujartorpaat.
AG aviisip allaaserisaani najukkani pisariaqartitsineq aallaavigalugu imeriartarfiit sivisunerusumik ammatinneqartalernissaannik politimesterip tunngavilersuutai atuakkit. Aviisi uani pisiassaavoq:
