Qatserisartoq pisuutinneqartoq
Angut Sisimiuni ilaannakortumik pisuutinneqarluni qaammatini marlunni inissiisarfimmiittussanngortillugu ukiuni marlunni misiligummik pineqaatissinneqarluni eqqartuunneqarpoq. Taassuma saniatigut aningaasat 20.194 koruuni pineqartumut taarsissavai.
Angut Sisimiuni 22. februaari 2021-miit siornamut 26. januaari tikillugu aningaasat Grønlandsbankeni aqqutigalugu, Sisimiuni Qatserisartut Peqatigiiffianni aningaasanik aqutsinissaminik pisinnaatitsissut atornerlullugu, aningaasanik tigusisarsimavoq.
Taanna allap piinik imminut paarititanik peqquserluttuliortutut uppernarsaatinillu pinerluttuliortutut pisuutinneqarpoq.
- Ilaannakortumik pisuutinneqarluni qaammatini marlunni pinerluuteqarsimasunut inissiisarfimmiittussanngorlugu ukiuni marlunni misiligummik pineqaatissinneqarpoq, Kalaallit Nunaanni Politiit nalunaarput.
Unnerluussisussaatitaasut piumasarigaluarpaat qaammatini marlunni pinngitsoorani inissiisarfimmiittussanngortinneqassasoq, kiisalu aningaasat 48.763 koruuninik taarsiissasoq.
Unnerluussutit ilaannut angut pinngitsuutinneqarpoq.
Pisuutinneqartoq pineqaatissiissut akuerivaa, unnerluussisussaatitaasut ulluni 14-inik eqqarsarfeqassallutik.
