Namminersorlutik Oqartussat umiarsuaatileqatigiiffianni Royal Arctic Linemi (RAL) pisortaaneq nutaaq atorfinitsinneqarpoq, umiarsuaatileqatigiiffik tusagassiuutinut nalunaarummi allappoq.

Niels Clemensen marsip aallaqqaataani atorfinittussatut siulersuisut toqqarpaat. Clemensen RAL-imi ilisimaneqareerpoq, pisortaanerusimasorlu Verner Hammeken ukiaq ingerlatseqatigiiffimmit tunuarmalli pisortaanertut atorfeqarpoq.

RAL-ip siulersuisuini siulittaasoq, Pâviâraq Heilmann, atorfinitsitsineq pillugu ima oqarpoq:

- Ingerlatseqatigiiffimmi pisortaanertut atorfiup eqqortumik inuttalerneqarnissaa anguniarlugu sulisussarsiornerup pimoorussamik sunniuteqarluartumillu ingerlanneqarnissaa pingaartissimavarput. 

RAL-imi 1993-imi atorfinitsinneqaqqaartoq

- Royal Arctic Line A/S attaveqaasersuutinik pingaarutilinnik isumaginnittuuvoq taamaalillunilu aamma nunatsinnut tamarmut pingaaruteqartupilussuulluni, nioqqutissanik eqqussuinermut tunngatillugu, pingaartumillu aamma nunatsinni tunisassiat avammut niuerutigineqarnerannut tunngatillugu, siulersuisut siulittaasuat oqarpoq.

Sulisussarsiortarfik avataanersoq suleqatigalugu sulisussarsiorneq ingerlanneqarpoq piukkunnaatilinnillu nalilersuisoqareersoq siulersuisut qularutiginngilaat Niels Clemensen atorfiup isumaginissaanut eqqortuusoq.

Niels Clemensen Royal Arctic Line A/S-imi atorfinitsinneqaqqaarpoq januaarip aallaqqaataani 1993-imi, ullormi ingerlatseqatigiiffiup pilersinneqarfiani, shippingillu iluani sivisuumik aamma suliaqarsimalluni.

RAL-imi assigiinngitsunik atorfeqartarnermi saniatigut Niels Clemensen ilaatigut Port of Hanstholmimi pisortaasimavoq Fabricius Marine A/S-imilu niuernermut pisortaasimalluni.

Ingerlatseqatigiiffik oqallisaaqisoq

Pisortanngortup atorfik ukiuni kingullerni tamanut politikkikkullu soqutigineqarluartoq atorfigissavaa. Niels Clemensenip siuliata Verner Hammekenip RAL-imi allannguinerit arlallit siuttuuffigisimavai, ilaatigut Aalborg Havnimik ukiorpassuarni suleqateqarnerup taamaatinneqarneranik kiisalu Islandimiumik Eimskipimik suleqateqalernermik kinguneqartumik.

Verner Hammekenip tunuarneranut atatillugu siulersuisuni siulittaasoq oqarpoq inuussutissarsiortut oqaloqatiginissaat aammalu Kalaallit Nunaanni pisariaqartitat aallaavigalugit angallannermut pilersaarusiornissaq pingaarnerutinneqartariaqartut.