Royal Arctic Linemi aningaasaqarnermut immikkoortortaqarfimmi sulisut tallimat, ullumikkut Danmarkimi sulisut, allamut nuunnissaminnik neqeroorfigineqarput, Royal Arctic Linemi pisortaaneq Niels Clemensen, Sermitsiaq.AG-mut oqarpoq.

Nuummi qitiusumik aqutsineq pillugu Niels Clemensen ima nassuiaavoq:

- Suliassaq pingaarutilik piginnaanerillu Nuummi aqutsisunut sapinngisamik qaninnerusumi inissisimanissaat uannut pingaaruteqarpoq. Aningaasaqarnermut tunngasuni suliassat ulluinnarni suliarineqartartut suliarinissaannut siunissami qarasaasiatigut iliuuseqarnikkut/RPA-mik teknologiimik atuinerulernissarput kissaatigaarput, suliniutillu tamakkua suli pilersaarutigineqarput.

Iluaqutigineqartut

Robotteknologiip aammalu silassorissuusiap atorneri iluaqutigineqareersut, aqqullu tamanna suli ineriartortinneqarniartoq, umiarsuaateqarfik ilisimatitsivoq.

- 2023-mi sullitatta inniminniineri nammineerluni ingerlasarnerinik suliniut iluatsilluartumik naammassivarput. Ulloq unnuarlu inummik akuleruttoqarani inniminniinerit suliarineqarlutillu ingerlasarput. IT-robotimik taaneqartartoq tamatuminnga suliaqartuuvoq, pisortaaneq nassuiaavoq nangillunilu:

- Suliniut tamanna aqqutigalugu inniminniinermi kukkunerit annikillisinneqarput, aamma sullitatta inniminniinerminnik uppernarsaatinik sukkanerusumik tunineqartarput, uagutsinni immersukkat utaqqisariaqarneq ajoramikkit.