EU-p umiarsuaatileqatigiiffiit CO2-mik aniatitsinnginnerunissaanut kajumissaarniarlugit akitsuut nutaaq atulersippaa. RAL-ip sullitai akitsuummik akiliissapput, ukiumilu nutaamiit Atlantikup imartaani assartukkanut tamanut 1 procentimik akitsuuteqalerpoq.

EU-mi akitsuut atuutilersinneqariartuaartoq paasinarsivoq, RAL-illu missingersimavaa 2024-mi 8 millionit koruunit aningaasartuutaassasut. Aaqqiissulli tamakkiisumik atuutilersinneqarpat ukiumut 20 millionit koruunit missaannut qaffassasoq missingerneqarsimavoq, tassa 2026-mi assartuinermut akit tapii 2-3 procentimik qaffassapput.

EU-mut akitsuutit qaffanneqarnerat pillugu paasissutissaq paragraf 37 naapertorlugu aningaasaqarnermut naalakkersuisup Erik Jensenip Demokraatineersumut Jens-Frederik Nielsenimut akissutaani atuarneqarsinnaavoq.

Taarsiiffiginnittoqassanngitsoq

Aningaasartuuteqarnerunermut inuussutissarsiortut taarsiiffiginissaannik Naalakkersuisut pilersaaruteqanngitsut akissummi allassimavoq.

EU-p akitsuutaata Royal Arctic Line CO2-mik aniatitsinermut killigititanik pisinissamut pisussaaffilerpaa, taakkualu niuertut aningaasarsiuteqartullu allat niueqatigiittarfianni, akit allanngorarsinnaaffianni, nioqqutigineqarput, taamaammallu qanoq akeqassanersut siumut oqaatigiuminaappoq.

- llaatigut Bremerhaven tikittartussanngorlugu angalanermut pingaarnertut pilersaarut nutaaq allannguuteqarpoq. Tikittalerneratigut sivisunerusumik angalasoqartalertussaavoq, ilutigisaanilli Aarhusimi umiarsualivik aamma Thorshavn tikinneqassaartussaammata umiarsuit arriinnerusumik angalasinnaalissallutik, taamaalillunilu orsussamik atuineq annertunerulernavianngilaq. Allannguinikkut Royal Arctic Linep sømilimut ataatsimut nassiussat amerlanerusut assartorsinnaalissavai, taamaalillunilu umiarsuit CII-at (Carbon lntensity lndicator) pitsaanerulissalluni, umiarsuaatileqatigiiffik akissummi paasissutissiivoq.

Avatangiisinut mingutsitsinermik annikillisitsiniartoq

Royal Arctic Linep umiarsuaatini teknologiimik avatangiisinut mingutsitsinermik annikillisitsisunik ukiuni aggersuni atortulersornissaat pingaartissavaa:

- Pajuttaatit marluk (Irena Arctica aamma Mary/Silver Arctica) 2028-29-mi ima pisoqalisimatigissapput, taarserneqartariaqalissallutik. Umiarsuassat nutaat pisiarinerini akigititassaq eqqarsaatigalugu, umiarsuassanit nutaanit aniatitsinissaq sapinngisamik minnerpaaffimmiissasoq anguniagaavoq. Tamatumani teknologi sukkasuumik ineriartorpoq, soorluttaaq piumasaqaatit sukkasuumik allanngorartut. Taamaattumik teknologip ineriartornera ingerlatseqatigiiffiup malinnaaffigilluarniarpaa, ingerlatseqatigiiffiullu umiarsuaataannit ataatsimut aniatinneqartartup annikillisinneqarnissaanut teknologi atorneqarsinnaasoq atorniarpaa, Royal Arctic Line paasissutissiivoq.