RAL: Umiarsuup atlantikukkoortaatip Nuummut tikittarnera allanngussaaq
Royal Arctic Linep Nuummut tikittarnerata allanngortinneratigut niuertarfiit kissaataat tamakkiisuunngikkaluartumik naammassiniarneqarpoq, tassalu umiarsuup Nuummut tikittarnerata sapaatip akunnerani siusinnerusukkut tikittalernissaanik kissaat, taamaalilluni sapaatip akunnerisa naanerini niuertarfiit nutaanik nioqqutissaateqartalerniassammata.
Pisortaanerugallartoq Niels Clemensen Sermitsiaq.AG-mut ilisimatitsivoq, 2024-mi sapaatip akunnera 9-miit tallimanngornikkut tikittarunnaarluni sisamanngornikkut unnukkut tikittalissasoq. Niuertarfiit kissaataat taamaaliornikkut naaperiarneqarpoq.
Pingasunngornikkut umiarsuup tikittalernissaa misissorneqarsimagaluarpoq, tamannali ajornarsimavoq.
- Pingasunngornikkut umiarsuaq tikittalissagaluarpat, taava Aarhusimi pingasunngornikkut nioqqutissat umiarsuarmut issorareerneqartartussaanerat pisariaqarpoq. Tamannali maannakkut periarfissaanngilaq, umiarsuaatileqatigiiffiit allat umiarsualivik kranillu pingasunngornikkut atortarmatigit. Umiarsuaq maannakkut Aarhusimut sisamanngornikkut tikittarpoq, sisamanngornerullu unnuaqeqqaata tungaanut umiarsuaq usingiarlugulu assartugassanik usilersortarparput, taamaalillutalu unnuap qeqqata missaani umiarsuaq avatattussanngortittarlugu, Niels Clemensen Sermitsiaq.AG-mut nassuiaavoq.
Thorshavn tikinneqassaassaaq
Umiarsuup ingerlaarnissaanut pilersaarut ataqatigiissumik ingerlasinnaaqqullugu Savalimmiuni Thorshavn akunniffiusaraluartoq tikinneqassaassaaq.
Niuertarfiit kissaataattut pingasunngornikkut umiarsuup Nuummut tikittalernissaa piviusunngortinneqarsinnaassanersoq maannakkuugallartoq pisortaanerugallartup akissuteqarfigisinnaanngikkallarpaa.
Niels Clemensen erseqqissaateqarpoq angalanissamut pilersaarutip allanngortinneqarneratigut makku eqqumaffigisassaasut:
- Angalanissamut pilersaarutip allanngortinneqarneratigut Kalaallit Nunaat CO2-mik aniatitsinikillisaanermi tapertaanerulissaaq.
- Umiarsuup Nuummut tikittarnera siuartinneqassaaq sisamanngornermi unnukkut tikittartunngortillugu, tamanna pissaaq Thorshavnimut tikittarunnaartinneratigut.
- Sinerissap sinneranut pajuttaatit tikittarnerat aamma siuaallatsinneqassaaq, Nuummi usingiartarneq siuartinneqassammat.
- Danmarkimi umiarsuup usissaanik tunniussisarneq siuartinneqassaaq ataasinngornermi ualikkut sisamanut pisartussanngorluni, maannakkut marlunngornermi ualikkut sisamanut tunniussisarneq taamaalilluni siuartinneqassaaq.
- Avammut tunisassiat assartugassat tunniunneqartarnerannut killiliussaq ullunik pingasunik ilaneqassaaq.
