Royal Arctic Line ilisimatitsinikuuvoq  Eimskipimik atlantikukkut assartuusseqatigiittarneq allanngortinneqassasoq, Savalimmiunilu Thorshavnimut talittarneq atorunnaarlugu Tysklandimi Bremerhavnimut ukiortaamiit talittoqartalissasoq.

- Suli aalajangertoqartinnagu Royal Arctic Linemit aperineqarpugut Bremerhavnimut talittalernissaq isumassarsiatsialaanersoq. Suliniut tapersersimavarput, periarfissallu atorluarnissaa anguniarlugu niuertariaaserput piareersalerparput, Royal Greenlandimi pisortaaneq Susanne Arfelt Rajamand Sermitsiaq.AG-mut oqarpoq.

Royal Greenlandimut iluaqutissaq

Taanna nassuiaavoq nerisassanut nakkutillinermik aqutsisoqarfiup piumasaqaatai naammassiniarlugit allagartanik pissarsiniarneq sulissutigineqartoq, erseqqissarlugulu suliffeqarfiup Europami niuerfinnut nutaanut toqqaannartumik attaveqalersinnaanera pitsaasuuginnartoq.

- Cuxhavenimi tunisassiorfiuteqarpugut, Royal Arctic Linellu  suliniummini taamaasilluni tapersersorpaatigut. Uagutsinnut iluaqutaaginnassaaq nunat tamalaat talittarfiinut toqqaannartumik attaveqalernissaq, ilisimatitsivoq.

Suliffeqarfimmi pisortaq ilisimatitsivoq suliaq aatsaat aallartisartoq, Bremerhavnillu atulersinnaanissaanut Royal Arctic Linep akigititassai apeqqutaaqataalluinnartut. Bremerhaven Tysklandip avannaata kitaaniippoq Royal Greenlandillu Cuxhavenimi tunisassiorfianit 43 kilometeriinnarnik ungasitsigisumiilluni.