Kalaallit Nunaanni Uumasunut Nakorsaqarfik Inuussutissalerinermullu Oqartussaaffik aamma Inuussutissarsiornermut Naalakkersuisoqarfik ullut arlaqanngitsut matuma siorna sakkortuumik isornartorsiortumik tusagassiuutinut nalunaaruteqarpoq, tassani Kommuneqarfik Sermersooq ’’inuussutissanik tuniniaasunut piffissami sivitsortumi ilisimatitsisimanngimmat Brugsenip eqqaani inuussutissanik tuniniaaneq inerteqqutaalluinnarmat’’ pasillerneqarpoq.

Nakkutilliisoq

Inuussutissalerinermut oqartussaaffik nakkutilliisoqarnissaanik kalerriuteqarpoq, ullumikkullu kalaalimineerniarfiit peerneqarsimapput, kisianni uteqqinnissaannut piffissaq qanoq sivisutigisoq qaangiuppat uteqqissanersut apeqqutaavoq.

Sanarfinermut Avatangiisinullu aqutsisoqafimmi ingerlatsinermut pisortaq, Frank Rasmussen, Kommuneqarfik Sermersooq, inuussutissanut oqartussaaffiup kommunimut akisussaaffiliinera uniorluinnartoq, Sermitsiaq.AG-mut ilisimatitsivoq.

- Suna oqaluuserinerlugu sianiginngilluinnarpaat. 2014-2015-imi inuussutissanut oqartussaaffimmit, politiinit aamma kommunimit suleqatigiisitanik pilersitsisoqarpoq. Tassani oqaluuserineqarpoq: matumaniuna inatsit suna atuuttoq, Frank Rasmussen oqaluttuarpoq.

Inerniliussaq

Tuniniaaffiusut inuussutissanut piumasaqaatinik naammassinninnissaat inuussutissanik oqartussaaffiup qulakkeernisssaa akisussaaffigigaa, tassani inerniliunneqartoq, ingerlatsinermut pisortaq oqarpoq.

- Brugsenip eqqaani tuniniaaneq inerteqqutaanngilaq. Brugseni niuerniartarfiup saavani nunaminertanut piginnittuuvoq, uagutsinnut nalunaaruteqarnikuunngilaq imaluunniit ajornartorsiummik maalaaruteqarnikuunngilaq. Tuniniaaffiusut unioqqutitsinersut unioqqutitsinnginnersulluunniit nakkutigisinnaanngilagut, Frank Rasmussen oqarpoq.