Sisamanngorpat kitaata sineriaani Qeqertarsuup eqqaani nuissat atsinnissaat nittaalarnissaalu, kiisalu Kujataani anorersuarnissaa ilimasaarutigineqarpoq.

Tamanna pissutigalugu Air Greenlandip sisamanngornermi qulimiguulimmik timmisartuussinissani taamaatiinnarpai, soorluttaaq Maniitsumut Maniitsumiillu timmisartuussinissani taamaatiinnarai, mittarfimmi ungasissutsimut uuttuutip suli atorsinnaannginnera pissutigalugu.

Taama Air Greenland Facebookimi quppernermini pingasunngornermi ualikkut ilisimatitsivoq, tassanilu aamma allassimavoq timmisartuutileqatigiiffiup ilaasut angalanissamut pilersaarutinik nutaanik nassinneqartut.

RAL-ip Nanortalik avaqquttariaqarsimavaa

- Silaannakkut nassiussat taamaatitsinerit nassataannik aamma kinguaattuussapput, nassiunnerinilu aqqutit allanngussallutik, Air Greenland nangilluni allappoq.

Immakkut angallassineq aamma unammillernartoq, Nanortalimmilu sikorsuaqarnera pissutigalugu umiarsuup tikinnissaa taamaatiinnartariaqarsimasoq Royal Arctic Line nalunaarpoq.

- Sikorsuaqarnerata nalaa unammilligassaqarfiusartoq maanna nalaassimalerparput, Royal Arctic Line Facebookimini allappoq, piffissamilu aggersumi Kujataani sila pissutigalugu ajornartorsiuteqaqqissallutik umiarsuaatileqatigiiffiup naatsorsuutigaa:

Kippasimmik anorlerpat kangerluit sikunerulerumaarput

- Kippasimmik sakkortuumik anorlissangatinneqarmat sikorsuit kangerlunnut isaallutik ajornakusoortitsinissaat naatsorsuutigaarput. Sikorsuaqangaatsiarnera Saarlup Nanortallillu eqqaanni sikut assilineqarnerannit naqissuserneqarpoq.

Umiarsuaq nunaqarfiliartaat Ivalo Arctica sikuuallaarnera pissutigalugu Qeqertarsuarmut apuussinnaasimanngitsoq, Kangaatsiamulli aqqusaarnera pilersaarutit malillugit iluatsilluartumik naammassineqarsimasoq, umiarsuaatileqatigiiffik nangilluni allappoq.