Siumumit qinigassanngortittoq: Akileraarutip procentia ataaseq isorliunerusut ineriartortinneqarnerannuut atorneqarli
Nunap karsianut akileraarutit procentia ataaseq nunaqarfiit aamma isorliunerusut ineriartortinneqarnerinut atorneqassapput, Jens Kristian Therkelsen (S) qineqqusaarummi taama siunnersuuteqarpoq
- Nunaqarfinni isorliunerusunilu ukiut kingulliit inerisaasimaneq naammaginanngitsumik pisimavoq. Kissaatit ilaatigut ukiorpassuit piviusunngortinneqarneq ajorput.
Jens Kristian Therkelsen Siumumeersoq Inatsisartunut qinersinissamut qineqqusaarummi taama allapoq.
Taamaattumik nunap karsianut akileraarutip procentia ataaseq taakkununnga ineriartortitsinissamut atorneqartassoq, taanna siunnersuuteqarpoq.
Ukiut sisamat ingerlanerini 352 millionit koruunit
- Nunatsinninunap karsianut tamatta 10 procentimik akileraartarpugut, paasitinneqarneralu malillugu procenti ataaseq 88 millioninik koruuninik naleqarpoq. Siunnersuutigaara ukiumut nunap karsianit 88 millionit koruunit piviusunngortitsinissanut nunaqarfinnut isorliunerusunulluimmikkoortinneqartalissasut, taamaasilluta qinigaaffimmi ataatsimi 352 millionit koruunit atorneqarsinnaassagaluarmata, Jens Kristian Thekelsen erseqqissaavoq.
Taassuma oqarnera naapertorlugu Nunatsinni tamanna ineriartornermik naligiinnerulersitsissaaq.
- Ullumikkumut killiffimmiik nikinniartarneq ilungersunartumiippoq. Tamannalu qaangerneqartariaqalerpoq, oqallittarnerni assigiinngitsuni isorliunerusut pineqartillugit oqaatsit kusanartut annisuunneqartarnerat kinguneqartinneqartariaqalerpoq. Maannamullu taamaasiornissamut piffissanngorpoq. Utaqqikatappugummi, Jens Kristian Therkelsen oqarpoq.
Jens Kristian Therkelsen Uummannap eqqaani nunaqarfimmit Ikerasammeersuuvoq, taannalu nunaqarfiit nuna tamakkerlugu kattuaffianni KANUNUPE-mi siulittaasuuvoq.
