Inuit Ataqatigiit Siumumit Naalakkersuisooqatigiilernissamik isumaqatiginninniarnissamut qaaqquneqarput septembarip 21-ani.

- Toqqissisimanartumik Kalaallit Nunaata aqunneqarnissaa pisariaqarpoq, tamannalu inissinneqapallattariaqarpoq, Sara Olsvig Sermitsiaq.AG-mut oqarpoq.

Isumaqatiginninniarnissat ullut qulingiluat qaangiuppata aatsaat pissasut paasiuminaatsippaa. 

- Politikkikkut inissisimaneq ernumagaarput. Tassami Naalakkersuisuutitaqartut amerlanerussuteqanngillat.

Siumumi avissaartuunneq
Piaarnerpaamik Siumumik suleqateqalernissartik sulissutiginngikkaa oqarpoq.

- Toqqissisimasumik ingerlatsoqartariaqarpoq. Aalajangiiffigisassat amerlasuut isumaqatigiissutaasariaqarput. Taamaasiornissarli ajornakusoorpoq partii aqutsisup iluani aaqqiagiinngittoqarnera pissutaalluni. 

Partiimi aaqqiagiinngittoqarnera ullumi ersertoq oqarpoq, tassami aalisarnermut piniarnermut nunalerinermullu naalakkersuisoq Erik Jensen mittarfiliortiternissamut Danmarkimik isumaqatigiissutaasoq arfininngormat itigartissimammagu. Naalakkersuisooqatigiit ataatsimiinneranni imaqarniliami tamanna takuneqarsinnaavoq.

Naalakkersuisut IA-mit aqunneqartut?
IA siuttoqaralugu Naalakkersuisunngortitsisoqassanersoq aperineqarpoq.

- Soorunami partiit allat siulittaasui oqaloqatigereerpagut. Taamaattoqarsimanngitsuuppat eqqumiinnerusimassagaluarpoq, oqarpoq.

Siumukkut aamma Demokraatit suleqatissatut toqqarsinnaavaat.

- Oqareernittut Kim Kielsenimit sianerfigineqareerpunga. Isumaqatiginninniarnissanut qaaqqusaasimanerluta oqaaseqarfigerusunngilara, Niels Thomsen oqarpoq.

Partiit allat siulittaasui aamma sianernikuuppat?

- Tamanna aamma oqaasissaqarfiginngilara, Niels Thomsen Sermitsiaq.AG-mut oqarpoq.