Siumut: Ilaasortat eqqissiumanngillat
Siumup siulittaasua, Erik Jensen arlaleriarluni naqissusiisaraluartoq partii nukittuumik patajaatsumillu inissisimasoq, partiip iluaniit isornartorsiuineq naaffeqanngitsutut ippoq. Maanna aalajaalluni partiip anguniagaanik illersuilluartartoq torersumillu ingerlatsisoqarnissaanik siuarsaarusuttoq, Kommuneqarfik Sermersuumi kommunalbestyrelsimi ilaasortaq, Peter Davidsen isornartorsuisunut ilannguppoq.
Peter Davidsen partiimi Siumumi kinaluunniiunngilaq. Taanna kommunalbestyrelsimi ilaasortaavoq aammalu partiip Kommuneqarfik Sermersuumi nunap immikkoortuani akisussaasutut inissisimasuulluni, siusinnerusukkut partiip siulersuisuunerini ilaasortaasimavoq aammalu partiip Erik Jensenimit siuttoqarluni aqunneqarneranik illersuilluartuunini ilisimaneqaatigaa.
Maannali Erik Jensen siulersuisoqataalu aalajaatsunik tapersersorteqarnertik naatsorsuutigiinnarsinnaajunnaariartorunaraat ilimatsannarsivoq, tassami Peter Davidsen ammasumik allagaqarluni partiip aqunneqarneranik isornartorsiuilluni isummaminik saqqummiussivoq:
- Siumumi qinikkat tunuliaqutsigullu nalornartumik inississanngippata Siulittaassoq siulersuisuunernik tunuliaqutaqarluni avammut ersarissumik suaaruteqartariaqarpoq Siumut qanoq ataqatigiissumik ingerlariaqqinniarnersoq, ataatsimut siulersuisoqarfiit immikkortortaqarfiillu tunuliaqutigullu qanoq susassareqartigiilluta ingerlariaqqinniarpugut, Peter Davidsen allakkamini ammasumi apeqqutilliivoq.
Taassuma taamatut apeqqutilliinerminut innersuussutigaa isornartorsiuineq unitsitassaanngitsutut ittoq aammalu partii anngaasussiaannartunngorsimanerarlugu ullormiillu ullormut politikkimik ingerlatsisunngorsimanerarlugu isornartorsiuineq kiisalu partiimi ilaasortat nuimasut partiimit anisarnerat innersuussutigalugu.
Siulittaasoq siulersuisoqataalu nipaappallaartut
Peter Davidsenip erseqqissaatigaa ilisimaarigini immikkoortortaqarfiit aamma pisussaaffeqartut tunuarsimaannaratik aqqutit eqqortut atorlugit aaqqiiniaqataassallutik.
- Issanngunarpoq Siumup apeqqutinut angisuunut tunuarsimaarnera - Suniarpugut?
Taanna siulittaasumik siulersuisoqataanillu isornartorsiuivoq tunuarsimaarlutillu nipaappallaarnerarlugit:
- Siumup anguniarpaa naqisimaneqanngitsumik inuilli susassareqatigiillutik ikioqatigiillutillu ineriartornissaannik eqqarsartaatsip siammartinnissaa akuerineqarnissaalu, tamannalu pisussaaffiliivoq politikkikkut ingerlatsinermi apeqqutini angisuuni tamat (inuiaqatigiit) peqataatinneqarnissaannut tunngatillugu siulittaasoq partii sinnerlugu siunnerfimmik ersarissumik avammut saqqumisuunissaanik!
Taassuma ilaatigut assersuutitut innersuussutigai spiralilersuisimanermut tunngatillugu aammalu aalisarnermut inatsisissamut tunngatillugu partiip ersarissuliornissaa amigaataanerarlugit.
